У МУС Беларусі не прызнаюць факт збіцця студэнтаў, якіх затрымалі 27 кастрычніка. Раней адпаведную інфармацыю распаўсюдзілі праваабаронцы.
Як сцвярджаюць у МУС, 27 кастрычніка на вуліцы Ленінградская група студэнтаў ўдзельнічала ў несанкцыянаваным масавым мерапрыемстве.
«Некаторыя з іх стаялі каля дарогі: сачылі за з’яўленнем службовага транспарту з міліцыянтамі. Падчас спынення супрацьпраўных дзеянняў чацвёра маладых людзей аказалі супраціў і паспрабавалі схавацца. Адзін са студэнтаў, уцякаючы ад праваахоўнікаў, упаў і разбіў нос», – адзначаецца ў паведамленні МУС.
На студэнтаў былі складзены пратаколы, пасля чаго іх перадалі бацькам і кіраўніцтву ВНУ, кажуць у МУС. У дачыненні да студэнтаў складзены пратаколы паводле арт. 23.4 КаАП (непадпарадкаванне законнаму распараджэнню ці патрабаванню службовай асобы пры выкананні ім службовых паўнамоцтваў) і 23.34 КаАП (Парушэнне парадку арганізацыі або правядзення масавых мерапрыемстваў).
«Прэтэнзіяў і скаргаў на дзеянні міліцыянтаў не паступала», – сцвярджаюць у міліцыі.