Прэмʼер Канады Жустэн Трудо са спасылкаю на разведвальную інфармацыю заявіў, што самалёт «Міжнародных авіялініяў Украіны», які пацярпеў катастрофу 8 студзеня, быў збіты іранскай ракетай. «Гэта магло быць ненаўмысна», – заявіў Трудо на прэс-канферэнцыі ў Атаве 9 студзеня. Словы прэмʼера Канады цытуе тэлеканал CNN.
Трюдо заклікаў да грунтоўнага расследавання прычынаў катастрофы.
«Звесткі і дадзеныя сведчаць аб тым, што гэта быў паветраны ўдар», – адзначыў Трудо, іншых падрабязнасцяў ён не распавёў.
Раней карэспандэнт CBS News Крыс Ван Клэйв паведаміў у Тўітэры, што, на думку амерыканскіх чыноўнікаў, украінскі «Боінг» збіты іранскімі сродкамі СПА. А часопіс Newsweek са спасылкаю на крыніцы ў Пентагоне, паведаміў, што самалёт «МАУ», верагодна, быў збіты ракетай, выпушчанай з распрацаванага ў Расеі зенітна-ракетнага комплексу «Тор».
У сваю чаргу выданне The New York Times апублікавала відэа, на якім, як цвердзяць журналісты, бачны момант, як ракета трапляе ў пасажырскі лятак.
8 студзеня ўкраінскі «Boeing 737» упаў побач з тэгеранскім аэрапортам. На борце самалёта рэйса PS752 Міжнародных авіялініяў Украіны былі 11 грамадзянаў Украіны (2 пасажыры і 9 чальцоў экіпажа), 63 – Канады, 82 – Ірана, 3 – Нямеччыны, 10 – Швецыі, 4 – Афганістана, 3 – Вялікай Брытаніі. Усяго на борце было 176 чалавек, усе пасажыры і чальцы экіпажу загінулі.
Чытайце па тэме:
AA belsat.eu