На курортах у Тайландзе ўзарвалі 12 бомбаў.
Абноўлена. Беларускіх грамадзянаў сярод пацярпелых у выніку выбухаў у Тайландзе няма. Пра гэта распавёў другі сакратар амбасады Беларусі ў Вʼетнаме Зміцер Гіль.
У пяці правінцыях Тайланду, пачынаючы з вечара 11 жніўня, адбыліся 12 выбухаў, у выніку якіх загінулі чатыры асобы. Больш за 30 асобаў параненыя. Бомбы спрацавалі на папулярных курортах, уключаючы Хуахін і Пхукет.
Ніводная з узброеных груповак не ўзяла на сябе адказнасць за выбухі. Паводле ўладаў Тайланду, выбухі не маюць адносінаў да ісламскага тэрарызму. Прадстаўнік паліцыі сцвярджае, што гаворка ідзе не пра тэракты, а пра «мясцовы сабатаж».
Міністэрства замежных справаў Беларусі сочыць за сітуацыяй у сувязі з выбухамі на курортах Тайланду.
«МЗС уважліва адсочвае сітуацыю. Высвятляецца, ці ёсць грамадзяне Беларусі сярод пацярпелых», – адзначыў начальнік упраўлення інфармацыі беларускага вонкавапалітычнага ведамства Дзмітрый Мірончык.