Праваслаўны святар і дзве студэнткі БДМУ пачалі галадаванне, каб падтрымаць палітвязня Ігара Лосіка, які галадуе больш як месяц.
Як паведамляе «Рупар БГМУ», дзве студэнткі Беларускага дзяржаўнага медычнага ўніверсітэту Маргарыта Трафімовіч і Элеанора Арзуманян абвесцілі пра галадоўку на знак салідарнасці з Ігарам Лосікам. Дзяўчыны маюць надзею, што такім чынам пераканаюць Ігара Лосіка спыніць галадаванне.
Між тым TUT.by публікуе ліст менскага праваслаўнага святара храму Богаз’яўлення Уладзіслава Багамольнікава, які 19 студзеня таксама абвесціў аб сваёй галадоўцы.
«Планую працягваць, пакуль галадоўку працягвае Ігар. Калі здарыцца непапраўнае, я паспрабую пратрымацца столькі ж дзён, колькі пратрымаўся ён. Спадзяюся, што да гэтага не дойдзе і яму заменяць захаду стрымання на хатні арышт. Ці ён сам адмовіцца ад задумы, калі даведаецца, што цяпер гаворка ідзе не толькі аб ягоным уласным здароўі», – адзначыў святар.
На ягоную думку, Ігар здзяйсняе памылку, бо «ўладам, падобна, абыякава, што з ім стане».
«Я ўпэўнены, што абсалютна ўсе людзі могуць мяняцца. І той чыноўнік, ад каго цяпер залежыць жыццё Ігара Лосіка, можа ўзяць на сябе адказнасць за ягонае жыццё або сысці з пасады, каб не браць адказнасці за іншы варыянт. І перад тым, хто яго зменіць, будзе стаяць той самы выбар. Сёння я напісаў Ігару ліст. Не буду адгаворваць яго, але паведамлю пра сваё рашэнне. Хай ён паступіць, як палічыць патрэбным», – адзначыў айцец Уладзіслаў.
Блогер і палітычны вязень Ігар Лосік галадуе з 15 снежня 2020 года на знак пратэсту супраць сваёй няволі. Хлопец застаецца за кратамі ды больш за паўгода не бачыў сям’і – жонкі і 2-гадовай дачкі. У сваіх лістах на волю Ігар пастаянна піша пра тое, што мае намер ісці да канца, бо іншых шляхоў выказаць уласную пазіцыю ў яго не засталося.
МГ belsat.eu
