Беларусь увяла экалагічны падатак на транзіт нафты па сваёй тэрыторыі

10.01.202019:02

Аляксандр Лукашэнка 10 студзеня падпісаў указ №9 «Аб падаткаабкладанні», перадае БелТА.

З указу вынікае, што для арганізацыяў, якія ажыццяўляюць транспартаванне нафты і нафтапрадуктаў, устаноўлена стаўка падатку на прыбытак у памеры 50 %.

Паводле дакументу, гэта зроблена «у мэтах фармавання крыніцы грашовых сродкаў для ліквідацыі магчымых экалагічных наступстваў у выпадку аварыі на магістральным нафтаправодзе або іншых непрадбачаных сітуацый, звязаных з перамяшчэннем нафты і нафтапрадуктаў па тэрыторыі Беларусі».

Акрамя таго, аб’ектам падаткаабкладання экалагічным падаткам прызнана транзітнае транспартаванне па тэрыторыі Беларусі нафты і нафтапрадуктаў магістральнымі трубаправодамі.

Нафтаперапрацоўчы завод у Мазыры.

Фота: Vasily Fedosenko / Reuters / Forum

***

Нагадаем, з 1 студзеня Расея спыніла падачу нафты для НПЗ Беларусі праз тое, што Масква і Менск не заключылі новыя кантракты. Беларускія НПЗ працягвалі працаваць, але загрузка вытворчых магутнасцяў зніжаная да тэхналагічнага мінімуму. У звязку з адсутнасцю паставак нафты з Расеі з 1 студзеня Беларусь часова прыпыніла экспарт нафтапрадуктаў.
4 студзеня пастаўкі нафты на беларускія НПЗ аднавіліся – дамоўленасць была дасягнутая з кампаніямі алігарха Міхаіла Гуцэрыева, які сябруе з Лукашэнкам. Першая партыя закупаецца па цане, што выключае прэмію расейскім пастаўшчыкам (раней кошт паставак разлічваўся як рынкавы кошт плюс прэмія прыкладна $ 10).
Дамоўленасць на пастаўкі нафты на дзяржаўным узроўні дасягнуць так і не атрымалася. «У двух словах, чаму з прэзідэнтам Расеі не дамовіліся па нафце. Таму што РФ хоча, каб мы купілі ў яе нафту па цэнах, вышэйшых за сусветныя. Дзе такое бачана?! Таму я і адмовіўся ад такой нафты. І прама заявіў, калі не будзе паставак па сусветнай цане з Расеі нафты, мы знойдзем гэтую нафту ў іншым месцы. Што мы і робім. І знайшлі», – заявіў Лукашэнка.

КА belsat.eu

Беларусь-Расея нафтавыя перамовы падаткі падатковы манеўр указы Лукашэнкі