Усяго месяц таму прасілі ў 1,7 раза больш за транзіт нафты. Чаму цяпер будзе менш, не тлумачылі.
Савет міністраў Беларусі 29 снежня апублікаваў пастанову аб зменах ставак вывазных мытаў на нафту і нафтапрадукты. Месяц таму ўжо публікавалі падобную пастанову – паступова падвышала мыты.
Ад 1 чэрвеня мыты пачыналі падвышаць, цяпер жа адкацілі да памераў, ніжэйшых за вясновыя. Так, за 1 тону сырой нафты, мазуту, нафтавага бітуму, вазеліну і парафіну, адпрацаваных нафтапрадуктаў вясной прасілі $ 54,9, у снежні – $ 77,5, а ад 1 студзеня 2022 года будуць прасіць $ 46,7.
За тону простагоннага бензіну цяпер просяць $ 42,6, а з пачатку 2022 года будуць прасіць $25,6. Мыты на таварныя бензіны, дызельнае паліва, лёгкія і сярэднія дыстыляты, бензол, талуол і ксілол, змазачныя алівы знізяць з $ 23,2 да $ 14.
У чым справа, урад не тлумачыў. Але рашэнне апублікавалі пасля таго, як Аляксандр Лукашэнка паляцеў да Уладзіміра Пуціна. А ў пачатку снежня «Беларуснафта» скасавала свае планы экспарту ў Нямеччыну на 2022 год па нафтаправодзе «Дружба» пасля новых санкцыяў Еўразвязу.
Аляксандр Лукашэнка тым часам пагражае перакрыць расейскі газ для Еўразвязу.
АА belsat.eu