Неадкладна і безумоўна вызваліць усіх палітычных вязняў заклікаў улады Беларусі Дзяржаўны дэпартамент ЗША. Адпаведную заяву, падпісаную дзяржаўным сакратаром Энтані Блінкенам, апублікавалі на сайце ведамства 27 студзеня.
Дзярждэпартамент ЗША нагадвае: паводле звестак беларускіх праваабаронцаў, на дзень 27 студзеня ў месцах зняволення застаюцца больш за 1000 палітвязняў.
«Злучаныя Штаты зноў заклікаюць неадкладна і безумоўна вызваліць усіх палітычных зняволеных, прызнаючы гэта як неабходны крок Беларусі для пераадолення палітычнага крызісу. Мы працягнем дабівацца правасуддзя для ахвяраў палітычных рэпрэсіяў і адказнасці для парушальнікаў», – гаворыцца ў заяве.
ЗША заклікае Беларусь выконваць узятыя на сябе абавязкі як дзяржавы – удзельніцы Арганізацыі бяспекі і супрацы ў Еўропе ды міжнародныя прававыя абавязкі ў абароне правоў і асноўных свабодаў чалавека.
«Мы падтрымліваем народ Беларусі, які імкнецца да будучыні, заснаванай на вяршэнстве закону і адказным дэмакратычным дзяржаўным кіраванні», – паведамляецца ў заяве дзяржсакратара ЗША.
«Са жніўня 2020 года ЗША ў каардынацыі з саюзнікамі і партнёрамі ўвялі пяць блокаў санкцыяў супраць афіцыйных асобаў і прыхільнікаў жорсткага рэжыму Лукашэнкі. Гэтыя санкцыі захаваюцца, пакуль улады не спыняць безупынна рэпрэсаваць беларускі народ, у тым ліку вызваліўшы без усялякіх умоваў усіх палітычных зняволеных», – дадае Энтані Блінкен.
Нагадаем, што 27 студзеня праваабаронцы прызналі палітычнымі вязнямі яшчэ 12 чалавек. Колькасць палітвязняў у Беларусі складае 1007 чалавек.
ЗК belsat.eu