24 сакавіка група праціўнікаў акумулятарнага заводу пад Берасцем схадзіла на сустрэчы з чыноўнікамі. У прыватнасці, яны сустрэліся з кіраўніцтвам Берасцейскага райвыканкаму і абласнога савету дэпутатаў.
Сустрэчы не далі плёну, чыноўнікі заявілі, што для рэферэндуму няма падставаў, і што гэта не мэтазгодна. Хоць летам мінулага года падчас візіту ў Берасце Аляксандр Лукашэнка паабяцаў, што лёс заводу на мясцовым рэферэндуме вызначаць жыхары рэгіёну.
– У снежні мінулага года чыноўнікі прынялі рашэнне запусціць акумулятарны завод, а на думку берасцейцаў і жыхароў Берасцейскага раёну не звяртаць увагі, і з 13 сакавіка шкоднае прадпрыемства фактычна і юрыдычна працуе. Але праціўнікі заводу не спыняюць сваёй працы, – сказаў у размове з «Белсатам» праваабаронца Раман Кісляк.
Амаль тры гады людзі пратэставалі супраць будаўніцтва акумулятарнага заводу, а пасля прэзідэнцкіх выбараў гэты пратэст быў фактычна задушаны. Аднак актывісты не трацяць надзеі спыніць працу шкоднага на іхную думку прадпрыемства.
АЛ belsat.eu