З 4 жніўня працягваецца закрыты судовы працэс над Максімам Знакам і Марыяй Калеснікавай. Родныя і паплечнікі абвінавачаных не могуць патрапіць на паседжанні, а адвакаты не могуць казаць пра акалічнасці справы, паколькі знаходзяцца пад падпіскай аб неразгалошванні. Тым не менш адвакат Максіма Знака распавядае пра рэакцыю абвінавачанага і некаторыя моманты выступу Максіма, піша Telegram-канал Віктара Бабарыкі.
23 жніўня а 9:30 працягнецца закрыты працэс па справе Марыі Калеснікавай і Максіма Знака. Патрапіць на паседжанне родныя і блізкія абвінавачаных змогуць толькі падчас вынясення прысуду. Агулам грамадскасці не вядома, на чым грунтуюцца абвінавачванні, вядома, што Максіму і Марыі пагражае да 12 гадоў пазбаўлення волі.
«Максім, як ён і планаваў перад пачаткам судовага разбору, актыўна ўдзельнічае ў працэсе. Ён зрабіў дэтальныя паказанні, аспрэчвае ўсе інкрымінуемыя яму захады, а цяпер падрабязна каментуе доследныя матэрыялы справы, у якіх, як абарона паказвала раней, няма ніякіх доказаў яго віны. Марыя ў пасяджэнні займае такую ж актыўную пазіцыю. На гэты момант ужо даследавана значная частка матэрыялаў, аднак да завяршальнай стадыі мы яшчэ не падышлі. Тым не менш, калі б не было пасяджэнне закрытым, грамадства ўжо цяпер пераканалася б, што выстаўленае абвінавачванне не заснавана на рэальнасці», – кажа адвакат Максіма Знака Яўген Пыльчанка.
Суд па справе Марыі Калеснікавай і Максіма Знака пачаўся ў закрытым рэжыме 4 жніўня. Судзяць палітвязняў у судзе Менскага раёну па адрасе: г. Менск, вул. Маякоўскага, 119А. Суддзя – Сяргей Епіхаў.
Паводле абвінавачання, Знак і Калеснікава «супольна з іншымі асобамі не пазней за 16 ліпеня 2020 года ўступілі ў таемную змову з мэтаю захопу дзяржаўнай улады неканстытуцыйным шляхам».
Ім пагражае да 12 гадоў турмы.
СК belsat.eu
