Аляксандр Лукашэнка вырашыў адказаць на закрыццё Кіевам паветранай прасторы Украіны для беларускіх самалётаў.
Наведваючы 19 чэрвеня ў Менску 2-ю дзіцячую клінічную больніцу, Лукашэнка заявіў:
«Раз Украіна закрыла нам пралёт, то мы з Украіны не будзем проста прымаць самалёты», – перадае «Пул Первого».
Нагадаем, што Украіна яшчэ з 26 траўня прыпыніла авіязлучэнне з Беларуссю. У прыватнасці, украінскім кампаніям і самалётам было забаронена лятаць у паветранай прасторы Беларусі.
А ад 29 траўня Украіна ўзмацніла «паветраныя санкцыі» супраць афіцыйнага Менску. Цяпер быў забаронены і транзітны палёт беларускіх самалётаў ва ўкраінскім небе.
Усё гэта стала адказам на прымусовую пасадку ў Менску рэйсу Афіны-Вільня, на якім ляцеў блогер Раман Пратасевіч.
МГ belsat.eu