У Баранавічах 19 траўня ўпаў самалёт. Пра гэта першым паведаміла мясцовае выданне Intex-Press.
Упаў вайсковы самалёт. Спачатку паведамлялася, што на борце быў адзін пілот і што ён катапультаваўся, піша «Наша Ніва».
«Хвілінаў трыццаць ужо гудзе верталёт. Да таго ляталі самалёты, быў чуваць грукат. Цяпер уся вуліца Розы Люксембург у шоку, там пападалі рэшткі. З таго, што кажуць на рынку, – пілот паспеў адвесці самалёт ад дамоў і рухнуў у полі за прыватным сектарам. Цяпер усе цікаўныя рушылі туды», – казала жыхарка Баранавічаў.
Затым баранавіцкае выданне «Наш край» напісала, што самалёт узлятаў з аэрадрому у кірунку Усходняга мікрараёну.
На ўзлёце ён урэзаўся ў прыватны дом на вуліцы Розы Люксембург. У катастрофе загінуў лётчык.
Паводле відавочцаў, чацвёрка самалётаў адпрацоўвала палёты, адзін з іх упаў.
«Ён круціў трукі, потым штосьці ў яго здарылася, ён страціў вышыню, яго стала штарміць, ён стаў сыходзіць ад гораду, і ўпаў дзесьці ў баку Усходняга, наўрад ці нават паспеў за горад паляцець», – цытуе жыхарку Баранавічаў «Intex-press».
Белтэлерадыёкампанія паведаміла, што пілот у цяжкім стане.
На месца здарэння выехалі ратавальнікі.
Але затым у Міністэрстве абароны паведамілі, што пад Баранавічамі пацярпеў крушэнне вайсковы самалёт Лідскай штурмавой авіябазы Як-130.
«Пры выкананні вучэбна-трэніровачнага палёту экіпаж выявіў тэхнічную няспраўнасць. Праявіўшы мужнасць і гераізм, пілоты імкнуліся адвесці самалёт ад населенага пункту. Пераканаўшыся, што траекторыя падзення самалёта па-за жылымі дамамі, лётчыкі катапультаваліся», – адзначылі ў ведамстве.
Тым не менш, абодва лётчыкі – камандзір звяна вучэбна-баявой эскадрыллі маёр Андрэй Нічыпарчык і лейтэнант Мікіта Куканенка – загінулі.
Іншых ахвяраў і разбурэнняў няма, заявілі ў Мінабароны.
На гэтым тыдні, 21–22 траўня, у Баранавічах меліся адзначаць 150-годдзе гораду. Сярод іншага 22 траўня планавалі дэманстратыўныя палёты вайсковай авіяцыі. Ці захаваюцца яны і надалей у праграме свята, ды ці будзе самое свята, не вядома.
МГ belsat.eu