За «відэазапісы пабуджальнага характару» журналісту і футбалісту далі 2 гады калоніі
Журналісту і футбалісту Аляксандру Івуліну 19 студзеня прысудзілі 2 гады калоніі. Менавіта столькі, колькі і запытваў пракурор. Пра гэта паведамляе «Медиазона. Беларусь».
Івуліна, такім чынам, прызналі вінаватым у «арганізацыі дзеянняў, якія груба парушаюць грамадскі парадак або актыўным удзеле ў іх».
Вырак выносіў суддзя Сяргей Шаціла, які раней, сярод іншага, асудзіў на 2,5 года грамадзянку Швейцарыі Наталлю Хершэ.
Аляксандр Івулін – спартовы журналіст выдання Tribuna, аўтар праекту «ЧестнОК», футбаліст клубу «Крумкачы». Яго затрымалі 3 ліпеня 2021 года разам з ягоным калегам Яраславам Пісарэнкам. У іхнай кватэры правялі ператрус, а пазней адвезлі журналістаў на Акрэсціна.
Паводле следства, 23 жніўня і 27 верасня 2020 года Івулін разам з іншымі людзьмі «рухаўся па праезнай частцы праспекту Незалежнасці і вуліцы Сурганава ў Менску, блакуючы і перагароджваючы шлях аўтамабілям».
Акрамя таго, журналіст нібыта размяшчаў на YouTube «відэазапісы пабуджальнага характару, каб стварыць негатыўную ацэнку дзейнай улады». Абвінавачанне лічыць, што сваімі дзеяннямі Івулін арганізаваў групу грамадзянаў, якія ўдзельнічалі ў пратэстах са жніўня 2020 года да сакавіка 2021 года.
МГ belsat.eu
