Кіраўнік МЗС Літвы Габрыелюс Ландсбергіс заявіў, што сярод краінаў ЕЗ ёсць спробы выключыць «Белавію» з санкцыйнага спісу, піша Delfi.lt. Якая краіна выступае за выключэнне беларускай авіякампаніі са спісу, міністр не ўдакладняе, аднак не выключае, што гэта можа быць Нямеччына.
«Падобна, ёсць вельмі трывожная навіна, што з пакету санкцыяў, які рыхтуе Еўразвяз, спрабуюць прыбраць ледзь не адзін з самых важных элементаў – авіякампанію «Белавія», якая, як вядома, нясе адказнасць за вялікую колькасць мігрантаў, дастаўленых у Беларусь», – сказаў Ландсбергіс.
Міністр зазначыў, што бакі маюць права вета падчас узгаднення санкцыяў і дастаткова пярэчання толькі адной краіны, каб нейкі пункт выкраслілі.
Увядзенне дадатковых санкцыяў у дачыненні Беларусі ў адказ на распальванне міграцыйнага крызісу на мяжы з Еўразвязам узгаднілі раней на гэтым тыдні міністры замежных справаў ЕЗ.
Габрыелюс Ландсбергіс заяўляе, што ў яго няма дакладнай інфармацыі, якая краіна хоча выключыць «Белавію» з санкцыйнага спісу, аднак не выключае, што на гэта можа ўплываць размова Ангелы Мэркель з Аляксандрам Лукашэнкам. Кіраўнік літоўскага МЗС выступае катэгарычна супраць перамоваў з Лукашэнкам і падкрэслівае, што з ім «трэба размаўляць толькі на мове санкцыяў».
ГГ, belsat.eu