Вось і мінуў год, як пачаліся пратэсты супраць сфальсіфікаваных прэзідэнцкіх выбараў. Што толькі ні адбылося за гэты час. Але беларусы не забываюцца на падзеі. Мы сабралі галоўныя навіны ўсіх дзён пратэсту.
9 жніўня. Дзень галасавання. Людзі збіраюцца на вуліцах, каб выкааць нязгоду з фальсіфікацыяй выбараў. Па краіне за дзень затрыманыя больш за 3000 чалавек, шмат параненых.
11 жніўня. Улады вывозяць Святлану Ціханоўскую ў Літву. У Берасці смяротна раняць Генадзя Шутава.
12 жніўня. З Акрэсціна выпускаюць першых затрыманых. Яны распавядаюць пра катаванні. У Гомлі гіне Аляксандр Віхор.
13–14 жніўня. Па ўсёй краіне людзі становяцца ў ланцугі салідарнасці, выказваюцца супраць гвалту. На некалькіх заводах пачынаецца страйк.
22 жніўня. Зніклага Мікіту Крыўцова знаходзяць павешаным у Менску.
7–8 верасня. Марыю Калеснікаву спрабуюць вывезці з Беларусі. На мяжы Марыя рве пашпарт, пасля чаго яе затрымліваюць.
19 верасня. У Менску праходзіць найбуйнейшы жаночы марш.
23 верасня. Лукашэнка ладзіць таемную інаўгурацыю. Увечары людзі выходзяць на пратэсты.
5 кастрычніка. Праходзіць першы марш пенсіянераў.
11 лістапада. На плошчы Пераменаў у Менску адбываецца бойка з удзелам Рамана Бандарэнкі. На наступны дзень ён памірае.
15 лістапада. У нядзелю праходзіць Марш памяці Рамана Бандарэнкі, людзі збіраюцца на плошчы Пераменаў. Падчас стрыму затрымліваюць дзвюх журналістак «Белсату» – Кацярыну Андрэеву і Дар’ю Чульцову.
19 лістапада. Затрымліваюць журналістку TUT.by Кацярыну Барысевіч і доктара шпіталю хуткай дапамогі Арцёма Сарокіна.
18 лютага. Журналісткам «Белсату» Кацярыне Андрэевай і Дар’і Чульцовай вынеслі прысуд: два гады калоніі.
2 сакавіка. Журналістцы Кацярыне Барысевіч прысудзілі 6 месяцаў пазбаўлення волі. Доктару Арцёму Сарокіну – 2 гады пазбаўлення волі з адтэрмінаваннем.
20 траўня. Палітычны вязень Вітольд Ашурак памірае ў шклоўскай калоніі. Сілавікі ўварваліся ў менскую студыю, дзе здымалі праграмы «Белсату».
23 траўня. У Менску прымусова прызямліўся самалёт «Ryanair». Журналіста Рамана Пратасевіча і ягоную дзяўчыну Соф’ю Сапегу, якія былі на борце, затрымалі.
26 траўня. 18-гадовы Дзмітрый Стахоўскі скончыў жыццё самагубствам, абвінаваціўшы ў гэтым Следчы камітэт.
1 чэрвеня. Палітычны вязень Сцяпан Латыпаў спрабаваў скончыць жыццё самагубствам проста падчас суда.
4 чэрвеня. ЕЗ афіцыйна забараніў беларускім авіякампаніям палёты ў сваёй паветранай прасторы.
12 чэрвеня. Мяжу з Беларуссю часова заблакавалі ўдзельнікі мітынгаў адразу ў трох краінах – Польшчы, Літве і Украіне. Яны патрабавалі ад Еўразвязу паскорыць увядзенне санкцыяў.
24 чэрвеня. Еўразвяз увёў чацвёрты пакет санкцыяў супраць Беларусі. Шырокія сектаральныя санкцыі ўведзеныя супраць цэлых галінаў беларускай гаспадаркі, а не толькі асобных прадпрыемстваў і чыноўнікаў.
30 чэрвеня. Белтэлерадыёкампанію выключылі з Еўрапейскага трансляцыйнага звязу. Такое рашэнне прыняла выканаўчая рада арганізацыі.
6 ліпеня. Вярхоўны Суд прыгаварыў Віктара Бабарыку да 14 гадоў пазбаўлення волі ў калоніі ўзмоцненага рэжыму. Таксама яго аштрафавалі на 145 тысячаў рублёў. Бабарыка не можа абскардзіць выраку.
8–16 ліпеня. Па ўсёй Беларусі чыняцца ператрусы ў журналістаў і ў рэдакцыях незалежных СМІ, праваабаронцаў і актывістаў.
16 ліпеня. Вынеслі прысуд у «справе студэнтаў». Суддзя Марына Фёдарава прызначыла выкладчыцы і 11 абвінавачваным студэнтам ад 2 да 2,5 года калоніі агульнага рэжыму.
27 ліпеня. Сайт і сацсеткі «Белсату» прызналі экстрэмісцкімі. Такое рашэнне 27 ліпеня прыняў суд Чыгуначнага раёну Гомля. Падставай сталі матэрыялы праверкі ГУБАЗіК МУС па Гомельскай вобласці.
28 ліпеня. Святлана Ціханоўская сустрэлася з прэзідэнтам ЗША Джо Байдэнам.
1 жніўня. З Токіа спрабуюць вывезці бягунню Крысціну Ціманоўскую, якая крытыкавала кіраўніцтва беларускай зборнай. Яна абурылася, што яе паставілі на эстафету, да якой яна не рыхтавалася. У аэрапорце Ціманоўская звярнулася ў паліцыю і запрасіла гуманітарную візу ў Польшчы.
2 жніўня. Памежныя службы Літвы вырашылі разварочваць мігрантаў назад у Беларусь. З пачатку 2021 года на беларуска-літоўскай мяжы затрымалі больш за 4000 мігрантаў.