Украіна мае намер цалкам адасобіць сваю энергасістэму ад Расеі і Беларусі ўжо ў 2023 годзе. Пра гэта паведаміў міністр энергетыкі краіны Юрый Вітрэнка на перамовах са сваім літоўскім калегам Дайнюсам Крэйвісам.
«Працэс сінхранізацыі выходзіць на фінішную прамую. У наступным годзе Украіна адасобіцца ад энергасістэмаў Беларусі і Расеі, перайшоўшы ў ізаляваны рэжым. У 2023-м адбудзецца поўная сінхранізацыя з ENTSO-E», – сказаў Юрый Вітрэнка.
Таксама міністры абмеркавалі АЭС у Астраўцы.
«Гэта геапалітычны праект: гэта агульная пагроза для Літвы і Украіны, таму мы павінны праявіць салідарнасць, спыніўшы ейнае далейшае развіццё», – сказаў Дайнюс Крэйвіс.
Крэйвіс нагадаў, што Беларуская АЭС ужо сутыкалася з аварыямі і перабоямі ў працы. На ягоную думку, важна не гандляваць небяспечнай электраэнергіяй з Беларуссю.
Вітрэнка і Крэйвіс дамовіліся стварыць супольную працоўную групу, якая ў тым ліку будзе абменьвацца інфармацыяй пра стан бяспекі на Беларускай АЭС.
ЯП belsat.eu
