Міністр абароны Беларусі Віктар Хрэнін паведаміў пра рашэнне накіраваць у Казахстан «падрыхтаваную міратворчую роту са складу 103-й паветрана-дэсантнай Віцебскай брыгады сіл спецыяльных аперацый».
«У адпаведнасці з рашэннем Рады калектыўнай бяспекі АДКБ для выканання міжнародных і саюзніцкіх абавязанняў, Рэспубліка Беларусь накіроўвае для ўдзелу ва ўрэгуляванні крызіснай сітуацыі на тэрыторыі Рэспублікі Казахстан, здольнай прывесці да парушэння канстытуцыйнага ладу, страты суверэнітэту і незалежнасці, беларускі вайсковы кантынгент», – заявіў Хрэнін.
Відэа Міністэрства абароны Беларусі:
Паводле яго, падраздзяленне прайшло ўвесь комплекс навучання і падрыхтавана для выканання такіх задач. Яно ўкамплектаванае толькі вайскоўцамі па кантракце.
«Сёння ноччу гэта падраздзяленне здзейсніла марш у раён аэрадрому Мачулішчы, дзе ажыццёўлена пагрузка на самалёты Расейскай Федэрацыі. Цяпер ідзе вылучэнне да месца выканання задач», – падкрэсліў міністр.
Паводле звестак «Белсату», вайсковы ІЛ-76 вылецеў з Мачулішчаў каля 15:10. На сайце FlightRadar ягоны рэйс не паказваўся.
Між тым Міністэрства абароны Расеі паведаміла пра прыбыццё ў Казахстан першых падраздзяленняў у межах місіі АДКБ
Нагадаем, што Офіс Святланы Ціханоўскай, Каардынацыйная Рада і Народнае антыкрызіснае ўпраўленне выступілі з супольнай заявай аб недапушчальнасці накіравання беларускіх вайскоўцаў у аперацыі за мяжой.
На іх думку, «адпраўка войскаў, а таксама аказанне любой іншай ваеннай дапамогі дзейнаму ўраду Казахстана стварае небяспечны прэцэдэнт замежнага ўзброенага ўмяшання ва ўнутраныя палітычныя канфлікты».
МГ belsat.eu