Міграцыйны крызіс не спыняецца на межах Беларусі з Польшчай, Літвой і Латвіяй, але цяпер за дзень – дзясяткі, а не сотні спробаў нелегальнага пераходу.
Памежная ахова Польшчы паведаміла 6 студзеня пра чарговыя спробы нелегальна перайсці беларуска-польскую мяжу. За мінулы дзень перадухілілі 30 такіх спробаў у Дубічах-Царкоўных, Мельніках і Новым Двары. 30-гадовага егіпцяніна шукалі 6 гадзінаў.
Але было і незвычайнае здарэнне. Паводле Памежнай аховы Польшчы, беларускія сілавікі на адцінку мяжы ля Дубічаў-Царкоўных (з боку Камянца ў Беларусі) кідалі ў бок польскага патруля камяні і цагліны.
Масавыя спробы нелегальна перайсці польска-беларускую мяжу грамадзянамі трэціх краінаў (пераважна – Блізкага Усходу) пачаліся ў 2021 годзе, працягнуліся ў 2022-м. 4 студзеня польскія памежнікі спынілі 32 мігрантаў, 3 студзеня – 20, 2 студзеня – 16, 1 студзеня – 28.
Не спыняюцца і спробы перайсці беларуска-літоўскую і беларуска-латвійскую мяжу. Гэтак, за 4 студзеня латвійскія памежнікі спынілі 33 мігрантаў. За 5 студзеня літоўскія памежнікі не прапусцілі 13 мігрантаў.
АА belsat.eu