Наша Ніва: Кітай замарозіў Гуцэрыеву $ 580 млн на будаўніцтва Нежынскага камбіната
Пад пагрозай апынуўся праект будаўніцтва ў Беларусі Нежынскага горна-ўзбагачальнага камбінату, які кампанія расейскага алігарха Міхаіла Гуцэрыева «Славкалий» узводзіць на крэдытныя сродкі Кітая пад гарантыю беларускага ўрада.
Кітай у сувязі з санкцыямі замарозіў выдачу наступных траншаў крэдыту, будаўнічыя кампаніі з’язджаюць з пляцоўкі, паведамляе «Наша Ніва» са спасылкай на свае крыніцы.
З канца чэрвеня прыпыненыя будаўнічыя работы – паводле праекту выкарыстана $ 820 млн, а яшчэ $ 580 млн завіслі на кітайскім баку. «Славкалий» летам не атрымаў з іх чаканы транш у $ 103 млн з прычыны санкцый.
І хоць кампанія Міхаіла Гуцэрыева разам з беларускімі дзяржаўнымі структурамі спрабуе пераканаць кітайцаў вырашыць праблему, забудоўнікі зʼязджаюць з пляцоўкі, «Славкалий» мае перад імі даўгі.
Нагадаем, што свой самы маштабны праект у Беларусі Міхаіл Гуцэрыеў рэалізоўваў праз «GCM Global Energy PLC»: гэтая брытанская кампанія ёсць суўладальніцаю прадпрыемства «Слаўкалій», што будуе Нежынскі горна-абагачальны камбінат. Раней уласнікам «GCM Global Energy PLC» быў сам Міхаіл Гуцэрыеў, але пасля ўвядзення ў чэрвені санкцыяў ЕЗ ён перадаў свой пакет акцыяў малодшаму брату – Саіту-Саламу.
У жніўні, адразу пасля абвяшчэння брытанскіх санкцыяў, стала вядома, што Міхаіл Гуцэрыеў перадаў брату і свой пакет акцыяў у кампаніях «Нефтиса» ды «РуссНефть». Таксама алігарх пакінуў пасаду кіраўніка рады дырэктараў «РуссНефти». Кампанія пасля гэтага нават запрасіла юрыдычных кансультантаў, якія мусілі пацвердзіць, што Гуцэрыеў цяпер не кантралюе «РуссНефти» і парушэння нормаў санкцыйнага рэгулявання тут няма.
Санкцыі ўскосна мелі наступствы і для бізнесу сына Міхаіла Гуцэрыева – Саіда. Персанальна супраць яго ніхто абмежаванні не ўводзіў, але на фоне апошніх падзеяў ён прадаў свае долі ў трох крыптабіржах – Currency.com, Capital.com і Zubr.io. Пакупнікі – міжнародная крыптабіржа FTX і Віктар Пракапеня – чалавек, які мае цёплыя стасункі з сям’ёю Гуцэрыева. Прадстаўнікі Саіда сцвярджаюць, што ўгоду рыхтавалі з мінулага года. Аднак эксперты перакананыя, што гэта вынік заходніх санкцыяў, бо ўвесь звязаны з Гуцэрыевым бізнес стаў таксічным для еўрапейскіх партнёраў.
Неўзабаве пасля гэтага стала вядома, што Саід Гуцэрыеў сышоў і з пасады генеральнага дырэктара нафтагазавай кампаніі «ФортеИнвест». Праўда, Саід праз кіпрскую фірму «Beristore Holdings Limited» застаецца ўласнікам беларускага «Парытэтбанку».
МГ belsat.eu
