Ад імя «Белсату» ў Telegram невядомыя спрабавалі атрымаць фота і відэа з тварамі беларускіх мастакоў, якія ўдзельнічаюць у выставе, прысвечанай памяці Алеся Пушкіна. Гэта падман, распавядаем, як засцерагчы сябе.
Хтосьці піша беларусам замежжа з акаўнту ў тэлеграме @edytorBLST_bot, каб атрымаць звесткі пра мастакоў пад выглядам «Белсату». Прапануецца супраца: нібыта «Белсат» гатовы паўдзельнічаць у піяр-кампаніі падзеі, трэба толькі даслаць фота і відэа з людзьмі. У паведамленні махляроў згадваюцца розныя іншыя перавагі «супрацы», якія заахвочваюць чалавека ўступіць у камунікацыю. Гэты акаўнт не належыць «Белсату», ні пры якіх абставінах не трэба паведамляць туды ніякіх звестак.
Сапраўдныя кантакты «Белсату» наступныя:
- электронная пошта рэдакцыі сайту web@belsat.eu – яна пазначаная ў раздзеле «Кантакты» на сайце Belsat.eu;
- Telegram-акаўнт @edytorBLST – ён пазначаны ў апісанні каналу @belsat у Telegram;
- іншыя старонкі «Белсату» ў сацыяльных сетках – спіс тут.
Адзіны фірмавы Telegram-акаўнт @edytorBLST прымае паведамленні ад чытачоў, але ніколі не будзе пісаць вам першы. Таксама будзьце ўважлівыя, калі шукаеце медыя ці іншых людзей, каб не нарвацца на ашуканцаў.
Гэта не першая спроба падмануць людзей. Раней ад імя праграмы «Белсату» спрабавалі выведаць звесткі пра беларускіх добраахвотнікаў.
Калі з вамі спрабавалі звязацца ад імя «Белсату» ці «Вот Так», раскажыце нам пра гэта!
Арсен Рудэнка belsat.eu
