Аляксандр Азараў разам з паплечнікам з «BYPOL» Станіславам Лупаносавым заснавалі 24 сакавіка 2025 года ў Польшчы дэтэктыўнае агенцтва. «Белсат» даведаўся ў Азарава, з якімі запытамі туды можна ісці, ды іншыя падрабязнасці.
Поўная назва кампаніі – «Agencja detektywistyczna Reks» (Дэтэктыўнае агенцтва «Рэкс»). Цікавімся, як прыдумвалася назва. Аляксандр Азараў кажа, гэта першая назва, якая прыйшла ў галаву, да таго ж ёсць станоўчая асацыяцыя з серыялам «Камісар Рэкс».
«Думаю, у такой справе першае, што прыйдзе на думку, – заўсёды правільнае будзе», – адзначае суразмоўца.
Дзейнасць кампаніі акрэсленая як дэтэктыўная. Гэта азначае даволі шырокі спектр паслуг. Кампанія можа выкрываць праслухоўванне ў памяшканнях, аўтамабілях і тэлефонах, кансультаваць у галіне бяспекі, прадаваць і здаваць у арэнду спецтэхніку, дзеліцца суразмоўца.
«Магчымы збор доказаў паводле крымінальных і грамадзянскіх справаў, правяранне інфармацыі, розных фактаў, пошук людзей, у тым ліку родных і продкаў. Будзем правяраць і бізнес-партнёраў ды патэнцыйных працаўнікоў. Яшчэ можам зрабіць абследаванне мясцовасці. У нашыя кампетэнцыі ўваходзяць і сямейна-шлюбныя справы, звязаныя з выкрыццём здрады ці апекаю над дзецьмі», – працягвае суразмоўца.
Калі нас цікавіць нешта з пераліку, хоць праверка другой паловы, хоць бізнес-партнёра, Аляксандр Азараў запрашае карыстацца паслугамі, але іх выкананне магчымае толькі пасля заключэння афіцыйнай дамовы.
Ідэя адкрыць дэтэктыўнае агенцтва прыйшла таму, што бальшыня асобаў у «BYPOL» – спецыялісты ў акрэсленых справах, працягвае Азараў:
«Попыт мы яшчэ не вывучалі, але спадзяёмся, што праца ў нас будзе, бо мы першая такая беларуская кампанія ў Польшчы, якая да таго ж можа надаваць паслугі на расейскай мове. У Польшчы мільёны ўкраінцаў і каля 300 тысяч беларусаў. Гэтыя людзі таксама патрабуюць паслуг».
Пакуль арганізацыя толькі зарэгістравалася, таму справаў, якія былі б у працы і пра якія можна расказаць, яшчэ няма. Таксама не з’явілася сацсетак ці сайту кампаніі.
,,«Было шмат адміністрацыйнай працы, каб зарганізаваць дзейнасць. Гэта [рэгістрацыю. – Заўв. рэд.] заўважылі медыі і надрукавалі гэтую інфармацыю. Дзейнасць яшчэ не пачалася, але мы можам браць на працу людзей, якія маюць досвед у правядзенні аператыўна-вышуковых захадах», – кажа Азараў.
Пакуль праца не пачалася, то і прайс-ліст не складалі, таму, колькі будуць каштаваць паслугі беларускіх дэтэктываў у Польшчы, суразмоўца сказаць не можа.
Арсен Рудэнка belsat.eu
