Мяркуючы з дакументаў, новая агенцыя будзе надаваць дэтэктыўныя, інфармацыйныя і ахоўныя паслугі, весці раздробны гандаль камп’ютарным і праграмным абсталяваннем, ажыццяўляць кіна- і аўдыязапіс і інш.
Кампанія «Agencja detektywistyczna Reks» зарэгістравалася ў Польшчы 24 сакавіка 2025 года, заўважыла выданне Reform. У заснавальніках запісаныя ўдзельнікі ініцыятывы «BYPOL» — былыя сілавікі Аляксандр Азараў і Станіслаў Лупаносаў, а таксама жонка Азарава Таццяна.
Нагадаем, Азараў быў прадстаўніком АПК у справе аднаўлення правапарадку, але Святлана Ціханоўская звольніла яго ў 2023 годзе. Пасля расколу ў арганізацыі сілавікоў «BYPOL» частка сышла і стварыла асобную структуру «BELPOL», а Азараў застаўся кіраваць «BYPOL» разам з Лупаносавым.
У 2024 годзе на выбарах у Каардынацыйную раду Азараў узначаліў спіс «Закон і правапарадак». 22 траўня праз бот плану «Перамога» разаслаў заклікі галасаваць на выбарах і падтрымаць ягоны спіс, пасля чаго Азарава пазбавілі доступу да чат-боту і адхілілі ад выбараў у КР.
Тэса Анэйда / belsat.eu
