Другі год запар Офіс Святланы Ціханоўскай ладзіць у Вільні акцыю салідарнасці з палітвязнямі ў гадавіну поўнай ізаляцыі Сяргея Ціханоўскага. Станам на 9 сакавіка 2025 года пра яго нічога не вядома ўжо два гады.
«Я дзякую кожнаму і кожнай з вас, хто сёння тут. Дзякую за тое, што памятаеце пра нашых палітвязняў. За тое, што не спыняецеся і працягваеце змагацца. Вашая салідарнасць – гэта сіла, якая дапамагае перажыць самыя цяжкія выпрабаванні», – сказала падчас акцыі лідарка дэмакратычных сілаў Беларусі Святлана Ціханоўская.
Паводле апошніх звестак праваабаронцаў, у Беларусі ў рэжыме інкамунікада ўтрымліваюцца мінімум 9 беларусаў палітвязняў. Гэта Аляксандр Францкевіч, Уладзімір Кніга, Ігар Лосік, Андрэй Навіцкі, Мікалай Статкевіч, Сяргей Ціханоўскі, Максім Знак, Мікалай Банькоў і Віктар Бабарыка.
«Невядома, ці атрымліваюць яны медычную дапамогу і ў якім яны стане, невядома, у якіх умовах існуюць і з якімі выпрабаваннямі сутыкаюцца. Акцыя 9 сакавіка – магчымасць не толькі нагадаць рэжыму пра непазбежнасць правасуддзя, але і паказаць свету, што мы ведаем нашых герояў і працягнем змагацца за іх свабоду», – гаворыцца ў тэлеграм-канале Святланы Ціханоўскай.
Арсен Рудэнка belsat.eu
