9 сакавіка спаўняецца роўна два гады, як ад Сяргея Ціханоўскага былі апошнія весткі. З гэтай нагоды Святлана Ціханоўская напісала кранальны пост у сваім тэлеграм-канале.
Святлана Ціханоўская прызналася, што гэты час напоўнены пастаянным хваляваннем і пытаннямі без адказаў:
«Прайшло два гады з дня, калі я апошні раз чула навіны пра Сяргея. Два гады пастаяннай трывогі і страху. Кожны дзень мяне мучаць пытанні, на якія ніхто не можа адказаць. «Як ён сябе адчувае сёння?», «Ці дазваляюць яму выходзіць на вуліцу?», «Як яго здароўе?».
У сваім звароце беларуская дэмакратычная лідарка ўзгадала шчаслівыя моманты, калі іх сям’я была разам. Яна апісала цёплы летні дзень, калі разам з Сяргеем і дзецьмі адпачывала на дачы: дзеці гулялі на пляцоўцы, пабудаванай уласнымі рукамі, а яны з мужам смажылі шашлыкі і марылі пра будучыню.
,,«За апошнія гады я аб’ехала дзясяткі краін, пагутарыла з сотнямі палітыкаў і дыпламатаў, пазнаёмілася з сусветнымі лідарамі. Але ні адзін дзень не заменіць мне простага летняга вечара, калі мы былі разам усёй сям’ёй. Рэжым не толькі адабраў у нас свабоду і дом. Ён пазбавіў нас магчымасці быць побач з любімымі людзьмі», – піша Ціханоўская.
Святлана Ціханоўская адзначыла, што ейны боль падзяляюць сотні беларускіх сем’яў, якія чакаюць сваіх родных. Яна верыць, што супольныя пакуты і жаданне зменаў надаюць сілы змагацца далей.
«Няпроста год за годам захоўваць вытрымку, але ніхто з нас не самотны ў сваім горы. Калі я сярод беларусаў і бачу, як нашыя боль і злосць штурхаюць нас да змены сітуацыі ў Беларусі, я адчуваю, як той летні вечар з сям’ёй становіцца крыху бліжэйшы. Мы не спынімся, пакуль усе нашыя родныя не вернуцца дадому. І тады Беларусь стане краінай, дзе не трэба штодня баяцца за сваіх блізкіх», – адзначыла беларуская дэмакратычная лідарка.
Нагадаем, што Сяргей Ціханоўскі застаецца за кратамі паводле шэрагу абвінавачанняў, у тым ліку – «Арганізацыя масавых беспарадкаў», «Распальванне варожасці» і «Перашкаджэнне ажыццяўляць выбарчыя правы».
Суддзя Мікалай Доля засудзіў блогера на 18 гадоў калоніі ўзмоцненага рэжыму. У лютым 2023-га за нібыта зацятае непадпарадкаванне патрабаванням адміністрацыі папраўчай установы суддзя Іван Грынкевіч дадаў да гэтага тэрміну 1,5 года.
З 9 сакавіка 2023 года палітычнага вязня трымаюць у поўнай ізаляцыі ад свету.
Ціханоўскі стаў папулярным дзякуючы свайму YouTube-каналу «Страна для жизни», ён планаваў балатавацца на выбарах 2020 года. Быў затрыманы ў Горадні падчас правакацыі на пікеце, дзе збіраліся подпісы. У выніку замест Сяргея на выбары пайшла ягоная жонка Святлана.
Раман Шавель belsat.eu
