ЗША зноў увялі санкцыі супраць МЗКЦ. На гэты раз – за ракетную праграму Пакістану
Дзяржаўны дэпартамент Злучаных Штатаў паведаміў пра ўвядзенне новых санкцыяў у дачыненні да Менскага заводу колавых цягачоў (МЗКЦ). Прадпрыемства сумесна з некалькімі кітайскімі кампаніямі вінавацяць у тым, што яны дапамагаюць Пакістану вырабляць зброю масавага знішчэння.
«Менскі завод колавых цягачоў пастаўляў шасі для адмысловых транспартных сродкаў для пакістанскай праграмы далёкіх балістычных ракет. Такія шасі выкарыстоўваюцца Нацыянальным комплексам развіцця пры Мінабароны Пакістана (NDC) у якасці дадатковага абсталявання для запуску балістычных ракет», – паведамляе Дзярждэпартамент ЗША.
Акрамя МЗКЦ, у амерыканскі санкцыйны спіс трапілі і тры кампаніі з Кітая: «Xi’an Longde Technology Development Company Limited», «Tianjin Creative Source International Trade Co Ltd» і «Granpect Company Limited». Іх таксама вінавацяць у перадачы ракетных тэхналогіяў і рухавікоў Пакістану.
МЗКЦ, а таксама яго кіраўнікі Аляксей Рымашэўскі і Аляксандр Вецыяневіч, ужо знаходзяцца пад санкцыямі ЗША з 25 лютага 2022 года за саўдзел уладаў Беларусі ў вайне супраць Украіны.
Якуб Хруст belsat.eu
