Прэзідэнт Польшчы Анджэй Дуда пацвердзіў гатовасць сваёй краіны да размяшчэння ядравай зброі, піша польскае выданне «Fakt».
Анджэй Дуда падкрэсліў, што абмеркаванне магчымасцяў размяшчэння на тэрыторыі краіны ядравай зброі адбывалася ўжо некалькі разоў.
«Гэта ўжо некаторы час тэма польска-амерыканскіх перамоваў. Я ўжо казаў пра гэта некалькі разоў. Прызнаюся, калі мяне пра гэта спыталі, я заявіў пра нашу гатовасць. Расея ўсё мацней мілітарызуе раён Калінінграда. Апошнім часам яна перакідвае сваю ядравую зброю ў Беларусь», – падкрэсліў Дуда.
Таксама польскі прэзідэнт адзначыў, што Польшча з’яўляецца хаўруснікам Паўночнаатлантычнага альянсу і праводзіць агульную з ім палітыку.
«Калі нашы хаўруснікі вырашаць размясціць ядравую зброю ў рамках абмену ядравай зброяй таксама на нашай тэрыторыі для ўмацавання бяспекі ўсходняга флангу NATO, мы гатовыя да гэтага», – сказаў лідар Польшчы.
Канцэпцыя «Nuclear sharing» – гэта пагадненні паміж ЗША і шэрагам краінаў NATO пра перадачу іх ваенна-паветраным сілам у выпадку ваеннай неабходнасці ядравых бомбаў з базаў захоўвання ЗША у гэтых краінах.
Станам на 2019 год на тэрыторыі Еўропы знаходзілася каля 150 амерыканскіх бомбаў В61 – у такіх краінах, як Бельгія, Нямеччына, Італія, Нідэрланды, Турэччына. Але ў 2021 годзе Федэрацыя амерыканскіх навукоўцаў паведаміла, што колькасць ядравай зброі за 2 гады зменшылася са 150 да 100 (у першую чаргу за кошт вывазу бомбаў з базы Інджырлік у Турэччыне).
Раман Шавель belsat.eu
