22 красавіка – апошні дзень, калі абітурыенты ў Беларусі змогуць зарэгістравацца на цэнтралізаванае тэставанне. У тых, хто яшчэ не вызначыўся з прадметамі, па якіх хоча пісаць ЦТ, застаўся адзін дзень.
У пунктах рэгістрацыі можна будзе зарэгістравацца да 19:00, а ў онлайн-фармаце, запоўніўшы электронную форму на сайце Рэспубліканскага інстытуту кантролю ведаў, – да 12:00.
Пункты рэгістрацыі з’яўляюцца і пунктамі правядзення ЦТ. Усяго па рэспубліцы для гэтых мэтаў вызначана 40 установаў, яны знаходзяцца ў раённых, абласных цэнтрах і сталіцы. У Менску іх 12, яны знаходзяцца на базе ВНУ – БНТУ, БДУІР, БДАТУ, БДМУ, БДЭУ, БДПУ ім. М.Танка, БДУ, БДТУ, БДУКі, МДЛУ, Міжнароднага ўніверсітэту «МІПСА» і Акадэміі кіравання пры Прэзідэнце Беларусі.
Сёлета вызначаныя адзіныя тэрміны правядзення цэнтралізаванага экзамену і цэнтралізаванага тэставання.
Графік правядзення цэнтралізаванага тэставання ў 2024 годзе:
- беларуская мова – 30 траўня;
- расейская мова – 30 траўня;
- фізіка – 27 траўня, 6 чэрвеня;
- матэматыка – 27 траўня, 3 чэрвеня;
- хімія – 27 траўня, 6 чэрвеня;
- біялогія – 27 траўня, 3 чэрвеня;
- замежная мова (англійская, нямецкая, французская, іспанская, кітайская) – 27 траўня, 3 чэрвеня;
- гісторыя Беларусі – 27 траўня, 6 чэрвеня;
- грамадазнаўства – 27 траўня, 6 чэрвеня;
- геаграфія – 27 траўня, 3 чэрвеня;
- сусветная гісторыя (найноўшы час) – 27 траўня, 3 чэрвеня.
Тэрміны рэгістрацыі абітурыентаў для праходжання цэнтралізаванага тэставання ў рэзервовыя дні – з 10 чэрвеня да 14 чэрвеня.
Сертыфікаты ЦТ будуць выдавацца абітурыентам у пунктах правядзення з 1 ліпеня.
Графік ЦТ-2024 у рэзервовыя дні:
- 19 чэрвеня – усе навучальныя прадметы;
- 21 чэрвеня – усе навучальныя прадметы, акрамя расейскай мовы і беларускай мовы; 23 чэрвеня – расейская мова і беларуская мова.
Раман Шавель belsat.eu
