«Маскве патрэбнае паліва». Ніжнікаў пра рост паставак з беларускіх НПЗ у Расею
Рост паставак авіяцыйнага паліва з Беларусі ў Расею можа быць звязаны з наступствамі ўкраінскіх атакаў на нафтаперапрацоўчыя заводы ў РФ. Пра гэта ў каментары «Белсату» заявіў Рыгор Ніжнікаў з Фінскага інстытуту міжнародных стасункаў.
«Гэта патрэба Масквы, патрэба Расеі. Пасля атак Украіны на НПЗ Маскве трэба мець даступныя рэсурсы, даступнае паліва», – заявіў Рыгор Ніжнікаў.
Ён таксама нагадаў, што ў такіх пастаўках могуць быць зацікаўленыя і ўлады Беларусі, ды самыя беларускія НПЗ, якія пасля поўнамаштабнага ўварвання Расеі ва Украіну страцілі ўкраінскі і заходні рынкі. Паводле яго, у параўнанні з 2020-м ці 2021-м гадамі прыбыткі беларускай нафтаперапрацоўкі «ўпалі даволі істотна».
Тым не менш, заявіў Ніжнікаў, невядома, паводле якога кошту Беларусь прадае сваё паліва ў Расею:
«Калі мы паглядзім на экспарт калійных угнаенняў, то мы бачым, што Менск прадае іх з вялікім дысконтам. На расейскім рынку, дзе Масква таксама можа даволі шчыльна дыктаваць умовы продажу, мы можам казаць пра тое, што і тут Менск прадае з дысконтам, бо Лукашэнку грошы больш патрэбныя, чым нешта іншае зараз».
Эксперт адзначыў, што беларуская эканоміка зараз вельмі моцна залежыць ад расейскай, якая ў сваю чаргу «сядзіць на ваенным допінгу» і «працуе на шалёных ваенных грошах». А ўслед за расейскімі і беларускія прадпрыемствы працуюць на «расейскую абаронку»: «гэта і паліва, гэта і камплектуючыя, гэта і рознае абсталяванне, нават вопратка».
«Таму так, расейская вайна і падтрыманне Лукашэнкам вайны Расеі наўпрост сказваюцца на беларускай эканоміцы», – заявіў Ніжнікаў.
«Супольнасць чыгуначнікаў Беларусі» (СЧБ) паведаміла, што ў Беларусі назіраецца ўсплёск вытворчасці авіяцыйнага рэактыўнага паліва і яго паставак у Расею чыгуначным транспартам:
«За апошнія 10 дзён фактычна з нуля рэзка павялічаны аб’ёмы экспартных перавозак са станцыі «Барбароў» (Гомельскае аддзяленне БЧ – НОД-4) наліўных складаў з авіяцыйным рэактыўным палівам на станцыі Маскоўскай і Кастрычніцкай чыгунак РЧ у адрасы паліўных сховішчаў аэрапортаў Масквы, Санкт-Пецярбургу, Курска і Петразаводска».
СЧБ зафіксавала наступныя станцыі прызначэння на 17 мая: аэрапорты «Унукава», «Дамадзедава», «Жукоўскі», «Пулкава», «Петразаводск», а таксама Нафтапрадуктаперапамповачная станцыя ГПС «Шылава-3» і аэрапорт «Курск – усходні».
Апошні выкарыстоўваецца як грамадзянскай, так і ваеннай авіяцыяй. Паколькі пасля 24 лютага 2022 года там уведзеная забарона на палёты грамадзянскай авіяцыі, то цяпер выкарыстоўваецца толькі для ваенных патрэб.
«Па некаторых дадзеных, адтуль узлятаюць ваенная авіяцыя з кіраванымі авіяцыйнымі бомбамі і карэктуюцца авіяцыйнымі бомбамі на пілонах, для бамбардавання тэрыторый Украіны», – падкрэслівае СЧБ.
Што тычыцца Мазырскага НПЗ, з якога, падобна, узраслі пастаўкі, у асноўным завод вырабляе аўтамабільны бензін і дызельнае паліва з нізкім утрыманнем серы, бытавое пячное паліва, бытавы газ, тэхнічны бутан і асвятляльны газа, а таксама авіяцыйнае рэактыўнае паліва. СЧБ адзначае, што для яго вытворчасці «неабходная перанастройка абсталявання, што памяншае аб’ёмы выпуску асноўнай прадукцыі і значна зніжае выпуск некаторых найменняў, а менавіта самага запатрабаванага ў народнай гаспадарцы – дызельнага паліва».
«У выніку такой «брацкай дапамогі» ствараецца некаторы дэфіцыт прадукцыі, але ўжо для ўнутранага беларускага рынку», – піша СЧБ.
Рост паставак з Беларусі можа можа быць падрыхтоўкай да масіраванага ўжывання вайсковай авіяцыі, мяркуе супольнасць.
Якуб Хруст belsat.eu
