Курыя Віцебскай Архідыяцэзіі пацвердзіла арышт святароў-аблатаў Анджэя Юхневіча і Паўла Лемеха з Шуміліна. Іх пакаралі 15 і 10 соднямі арышту адпаведна, паведамляе праваабарончы цэнтр «Вясна».
Анджэя Юхневіча і Паўла Лемеха затрымалі 8 траўня ў Шуміліне. Тады парафія Маці Божай Фацімскай засталася без святароў ва ўрачыстасць Унебаўшэсця Пана, якую каталікі адзначалі сёлета 9 траўня. Па святароў прыехалі адразу тры машыны міліцыі. Як пазней сталася вядома «Katolik.life», у той жа дзень затрымалі верніцу.
«Хрысціянская візія» паведамляла, што Юхневіча і Лемеха вінавацілі ў «дыверсійнай дзейнасці на шкоду беларускай дзяржаве».
Вернікі распавядалі, што затрыманне адбылося пасля таго, як у Шуміліне прайшла сустрэча святароў і кансэкраваных асобаў Віцебскай дыяцэзіі:
«Калі ўсе раз’ехаліся, у касцёл прыбылі тры машыны з міліцыяй, усе былі ў цывільным. Агледзелі памяшканні і забралі айца Паўла. У той жа час айца Анджэя затрымалі ў дарозе – ён ехаў на сустрэчу».
Анджэй Юхневіч і Павел Лемех – грамадзяне Беларусі.
Арсен Рудэнка belsat.eu