Швецыя гатовая да размяшчэння на сваёй тэрыторыі ядравай зброі ў выпадку вайны. Пра гэта заявіў прэм’ер-міністр краіны Ульф Крыстэшан.
«У выпадку вайны гэта зусім іншае пытанне. Калі здарыцца найгоршае, дэмакратычныя краіны ў нашай частцы свету, канечне, мусяць быць у стане абараніць сябе ад краінаў, якія могуць пагражаць выкарыстаннем ядравай зброі», – паведаміў Ульф Крыстэшан у эфіры «Sveriges Radio».
Таксама шведскі прэм’ер дадаў, што «ўсё сяброўства Швецыі ў NATO і ўся шведская абарона накіраваныя на тое, каб не дапусціць такой сітуацыі».
«Мы падрыхтавалі два законапраекты. У іх Швецыя заяўляе, што ў нас не будзе сталых войскаў [NATO] або ядравай зброі на тэрыторыі Швецыі ў мірны час», – адзначыў прэм’ер.
Нагадаем, што ў студзені 2023 года Крыстэшан казаў, што размяшчэнне ядравай зброі на тэрыторыі Швецыі ў мірны час «малаімавернае». «Мы гэтак жа, як і іншыя краіны Скандынавіі, не бачым сцэнарыю, пры якім размяшчэнне ядравай зброі на нашай тэрыторыі ў мірны час магчымае», – заяўляў шведскі прэм’ер.
У сакавіку 2024 года, неўзабаве пасля прыняцця Швецыі ў Альянс, Крыстэшан ізноў падкрэсліў, што неабходнасць размяшчаць базы NATO або ядравую зброю на тэрыторыі краіны адсутнічае. Пра адсутнасць планаў размяшчэння ядравай зброі ў Швецыі заявіў 11 сакавіка 2024 года і генеральны сакратар NATO Енс Стольтэнбэрг.
Раман Шавель belsat.eu
