Шапуцька

Выломліваць крыжы з братэрскіх магілаў – гэта цяпер завецца «акцыя па прыборцы і добраўпарадкаванні Курапатаў».

Семдзесят крыжоў, якія стаяць па перыметры Урочышча Курапаты на мяжы Менску, знеслі на загад Бараўлянскага спецлесгасу. Ад самае раніцы ў мемарыяле памяці ахвяраў сталінскіх рэпрэсіяў дзяжурылі абаронцы Курапатаў, актывісты, праваабаронцы і прадстаўнікі медыяў – з аднаго боку ды міліцыя, КДБ, ДАІ, дзяржаўныя арганізацыі і будаўнікі – з другога.

У Курапатах зносяць крыжы, народны мемарыял ачэплены АМАПам. Навіна раніцай абляцела ўсю Беларусь. У месца масавых расстрэлаў сталі з’язджацца актывісты, журналісты, дэпутаты, праваабаронцы, палітыкі. У выніку міліцыя затрымала 15 асобаў, у тым ліку Паўла Севярынца, Дзяніса Урбановіча, Змітра Дашкевіча, Ніну Багінскую ды іншых.