Генадзь Сарокін

Больш за два тыдні спатрэбілася міністру абароны Беларусі Андрэю Раўкову на тое, каб пракаментаваць гібель Аляксандра Коржыча ў вайсковай частцы ў Пячах. За гэты час у беларускіх медыях з’явіліся сотні, калі не тысячы матэрыялаў пра дзедаўшчыну, Следчы камітэт адкрыў крымінальную справу, зʼявіліся паведамленні пра цэлы шэраг падазроных суіцыдаў і смерцяў у арміі. Але галоўны ваенны чыноўнік адказаў толькі на смерць, якая выклікала грамадскую рэакцыю.

Следчы камітэт распачаў 10 крымінальных справаў паводле факту смерці жаўнера ў Пячах. У шэрагу вайсковых злачынстваў падазраюць 2 афіцэраў і 7 сяржантаў і старшыну. Усе яны знаходзяцца пад вартаю і ўжо неўзабаве пачуюць абвінавачванні. Тым часам Міністэрства абароны працягвае пераконваць у тым, што супраць ведамства вядзецца інфармацыйная вайна.

Справа аб меркаваным забойстве жаўнера Аляксандра Коржыча ў вайсковай частцы ў Печах выклікала ланцуговую рэакцыю расследаванняў фактаў дзедаўшчыны і таямнічых смерцяў у беларускім войску.