Артур Вірбал

Гвалт у дачыненні да салдатаў, хабар, удары па галаве, ужыванне электрашокера. Былога прапаршчыка з Печаў Ігара Хішчанку пакаралі 5 гадамі зняволення ў калоніі ўзмоцненага рэжыму.

У Барысаве распачаўся суд над прапаршчыкам з навучальнага цэнтру ў Печах, дзе летась загінуў жаўнер Аляксандр Коржыч. Падсуднага абвінавачваюць у перавышэнні службовых паўнамоцтваў і хабары. Справа нібыта не звязаная з гучным выпадкам смерці Коржыча, праліць свет на якую следчыя яшчэ не спяшаюцца.

Давядзенне да самагубства праз здзекі і вымагальніцтва, непрыязныя стасункі з саслужбоўцамі ды самагубства праз псіхалагічную траўму. Следства назвала тры асноўныя версіі смерці Аляксандра Коржыча, якога 3 кастрычніка знайшлі павешаным у вайсковай частцы ў Печах – у пятле з мацерчатага пасу, з завязанымі нагамі ды надзетай на галаву майкай. Затрыманыя падазраваныя, аднак ці панясуць пакаранне ўсе вінаватыя ў злачынстве?