У новым выданні шоу «Я не буду гэтага есці!» распавядаем, як прыгатаваць халадзец. Ёсць варыянты для вегетарыянцаў і незвычайны мясны, які можна зрабіць на Вялікдзень.
У праекце «Я не буду гэтага есці!» вядомыя людзі дзеляцца з намі сваймі кулінарнымі траўмамі: распавядаюць, да якой стравы не могуць дакрануцца з дзяцінства і чаму. Задача нашых шэф-кухараў Вольгі Прыгаравай і Аляксандра Чыкілеўскага змяніць рэцэпт так, каб наш герой з’еў усё да апошняй лыжкі ды папрасіў яшчэ. Напрыканцы праграмы госць абірае пераможцу кулінарнай бітвы. І гэтым разам мы накіраваліся ў Кіеў скараць страўнікі ўкраінскіх зорак.
Госць новага выдання «Я не буду гэтага есці!» – спявак і радыёвядоўца Назар Хасан (Хас), які выконвае хіп-хоп.
«Ёсць стравы, якіх я цярпець не магу, – моршчыцца ён. – Гэта салянка, халаднік і халадзец».
«З усіх вышэй пералічаных рэчаў я таксама не ем халадзец. Я не буду гатаваць халадзец!», –заяўляе Вольга Прыгарава. Такога ад вядоўцы шоу мы і самі не чакалі.
У якасці выйсця з сітуацыі Вольга Прыгарава прапануе тры варыянты «антыхаладца». Гэта гранатавае жэле (якое яна падае з багетам і паштэтам з качкі, так што сама страва, у прынцыпе, мясная), вегетарыянскі «халадзец» з гароднінай і дэсертны, з алкаголем.
А чым здзівіць Аляксандр Чыкілеўскі? «Калі я пачуў, што [са словаў Хаса – рэд.] гэта выглядае, як корм для жывёлы, я вырашыў гэты вонкавы выгляд схаваць. І мне прыйшла думка падсмажыць яго ў паніроўцы».
Каб прыгатаваць жэле без дадатку жэлаціну, усе патрэбныя для стравы вадкія інгрэдыенты трэба давесці да кіпення, усыпаць агар-агар, зменшыць агонь і варыць, памешваючы, цягам 5–7 хвілін, пакуль маса не загусцее. Затым заслаць форму харчовай плёнкай, выкласці гародніну або садавіну (у выпадку з гранатавым жэле – нічога), заліць атрыманай вадкасцю і паставіць у лядоўню на 30 хв. Для падачы нарэзаць жэле так, як нам падабаецца і ўпрыгожыць.
Як пасмажыць халадзец у паніроўцы? І хто перамог у кулінарнай бітве? Глядзіце у новым выданні кулінарнага шоу «Я не буду гэтага есці!» (відэа ў пачатку артыкула).
Шоу «Я не буду гэтага есці!» глядзіце штонядзелю а 19:35 паводле менскага часу на тэлеканале «Белсат» праз спадарожнік «Astra 4A» (ранейшая назва «Sirius 4»), онлайн, на YouTube-канале «Белсат Life» або ў архіве на нашай старонцы.
Любіце гатаваць? Сачыце за абнаўленнямі на Facebook, у «Одноклассниках» і ў Instagram.
ІА, belsat.eu