Узбекістан раўняецца на «Барсэлону». Як жыве юнацкі футбол у Еўропе і Азіі

У сталічным футбольным манежы распачаўся турнір для юнацкіх футбольных зборных Кубак развіцця. Ён ладзіцца ў Менску ўжо 16-ты раз.

Сёлета ў спаборніцтвах юнацкіх футбольных зборных Кубку развіцця не бяруць удзелу каманды Расеі ды Украіны, якія найчасцей у ім перамагалі. Ды і колькасць гасцей скарацілася: раней за галоўны прыз змагаліся 12 зборных, цяпер – толькі 8.

Нацыянальная зборная Бельгіі ачольвае рэйтынг ФІФА. Яе юнацкія каманды – таксама сярод лідараў у Еўропе і ў цэлым свеце. Бельгійцы могуць сабе дазволіць мець некалькі паўнавартасных складаў футбалістаў-юнакоў. Адзін з іх прыехаў на сёлетні Кубак развіцця ў Менску:

«У нас ёсць асноўная юнацкая зборная, дзе сабраныя найлепшыя гульцы свайго ўзросту. Аднак мы таксама маем праект для футбалістаў, якія выглядаюць трохі горш, але могуць выдатна паказаць сябе ў будучыні. Сёння ў нашым складзе было шмат такіх гульцоў. Звычайна ў асноўны склад яны не трапляюць, але тут мы даем ім шанец паказаць сябе», – кажа Дэвід Пэнэман, асістэнт трэнера юнацкай зборнай Бельгіі.

Для Беларусі мець некалькі складаў юнацкай зборнай – сапраўдная раскоша, што ўжо казаць пра нацыянальную. Пра крызіс у нашым дзіцячым футболе кажуць не першы год. Праўда, цяперашняе скліканне каманды U-17 паказвае сябе крута. Хлопцы, якімі кіруе Андрэй Скарабагацька, прабіліся ў элітны раўнд чэмпіянату Еўропы. Галоўны трэнер зазначыў, што Федэрацыя футболу камандзе дапамагае, але ў рэгіёнах з маладымі футбалістамі працуюць без адзінай сістэмы.

«У нас ёсць акадэмія, якая ўключае чатыры ўзросты. Ёсць праграма. А ў вобласцях кожны клуб выбірае ўласную сістэму. Федэрацыя ім нічога не навязвае. Калі ў рэгіёнах добра будуць працаваць, то і агульная карціна будзе зусім іншай», – тлумачыць Андрэй Скарабагацька.

У першым матчы Кубку развіцця беларусы ўпэўнена разбілі супернікаў з Узбекістану – 4:1. Дарэчы, гэтая каманда, паводле яе трэнера Азамата Абдураімава, аддае перавагу еўрапейскаму стылю гульні, хоць і рэпрэзентуе азіяцкую краіну.

«Мы ездзілі глядзець, як працуе акадэмія іспанскай «Барсэлоны», галандскага «Аяксу». Стараемся ўзяць найлепшыя ўзоры трэнавальнай працы менавіта адтуль», – зазначае Абдураімаў.

Грузія ды Ізраіль – яшчэ дзве краіны на скрыжаванні Еўропы і Азіі. Абедзе, як і Узбекістан, развіваюць свой юнацкі футбол паводле еўрапейскіх стандартаў. У Ізраілі нават паклікалі на дапамогу спецыялістаў з Аўстрыі.

«Аўстрыйцы, якія працуюць супольна з нашаю федэрацыяй, дапамагаюць ізраільскім юнакам змяніць свой менталітэт і погляд на футбол. Яны вучаць нашых маладых футбалістаў быць агрэсіўнымі на полі ды заладаванымі на атаку», – гаворыць Салех Хасармі, галоўны трэнер зборнай Ізраілю U-17.

Дарэчы, адна з прыкметаў еўрапейскага выхавання футбалістаў – адсутнасць жорсткага патрабавання выніку. У нашых рэаліях ад перамог падначаленых часта залежыць фінансавы дабрабыт дзіцячых трэнераў, таму яны прымушаюць юнакоў браць медалі любым коштам. А ў той жа Грузіі дзецям да пэўнага ўзросту дазваляюць гуляць проста ў сваё задавальненне.

Акрамя згаданых зборных, за прызы Кубку развіцця змагаюцца яшчэ Фінляндыя, Ісландыя і Таджыкістан. Пераможца вызначыцца 25 студзеня. Дарэчы, летась наймацнейшымі на хатнім турніры сталі беларусы.

Дзяніс Ганчарэнка belsat.eu

Глядзі таксама

Больш матэрыялаў

Як зразумець, што СМІ вам хлусяць?

МАЗ ці БелАЗ. Хто раздавіў эканоміку?

Алена Захаранка сустрэлася з удзельнікам забойства бацькі

Замовіў гарбату па-беларуску – выйшаў міжнародны скандал

Леў Марголін: З Лукашэнкам дамаўляюцца толькі тыя, хто завозіць сюды мільёны

Павел Сапелка: Заканадаўства не дазваляе вязням рэалізоўваць свае правы чалавека

Што ўратуе айчынную эканоміку?

Беларускі кіберспорт: прафесійны і жорсткі

Беларускі рубель абваліўся праз нафту