Жыхары навакольных вёсак неаднаразова збіралі подпісы і звярталіся ва ўсе магчымыя інстанцыі з просьбаю прывесці да ладу сямнаццаць сажалак, поўных нечыстотаў. Нашая здымачная група зноўку накіравалася ў Міханавічы, каб сустрэцца з мясцовымі.
Побач са старымі сажалкамі пабудавалі яшчэ адну. Разам з жыхаркай Міханавічаў Галінай Шаціла мы пад’ехалі да адстойнікаў.
«Вось гэтая агромністая чаша з фекаліямі – гэта сажалка № 18 Менскводаканалу, – кажа Галіна. – Вось яна пакуль яшчэ амаль пустая, яна эксплуатуецца тры-чатыры месяцы. За чатыры гады яна цалкам запоўніцца. І вы ўяўляеце, як такі аб’ём будзе смярдзець?»
У адказах Менскводаканалу, якія атрымалі мясцовыя, напісана: зробленыя ўсе патрэбныя захады для абароны жыхароў.
«Вось гэтымі дрэўцамі, з якіх шмат ужо загінула, Менскводаканал нібы абараніў нас ад уздзеяння гэтай сажалкі з фекаліямі», – Галіна дэманструе нам паласу зялёных насаджэнняў.
Дагрукацца да адказных чыноўнікаў жыхарам не ўдаецца.
«Нядаўна ў нас была сустрэча ў Лугавой Слабадзе, – кажа Галіна Шаціла. – Там з намі размаўлялі прадстаўнікі Міністэрства здароўя і падначаленых арганізацыяў, Міністэрства прыроды і падначаленыя».
Жыхары загадзя накіравалі чыноўнікам вялікі спіс пытанняў. Сярод іх – пра бяспечнасць умоваў іхнага пражывання. Але ўсе пытанні нібы павісалі ў паветры… Жыхары больш за тры гадзіны спрабавалі дабіцца хоць нейкай канкрэтыкі…
«У нас у 2012 годзе не атрымалася, сёлета не атрымаецца з невядомых прычынаў. Распавядзіце нам што-небудзь, калі атрымаецца», – пыталіся жыхары ў чыноўнікаў на сустрэчы.
«На сённяшні дзень мы блізкія да таго, што мы пачынаем працу над гэтым», – пачулі жыхары ў адказ.
Адзінае, што паабяцалі чыноўнікі, – увосень пачаць хімічную нейтралізацыю сажалак. З пункту гледжання экалагічнай бяспекі тэхналогія спрэчная, але чыноўнікі абяцаюць хаця б зменшыць смурод.
Таксама ў праграме «Маю права»:
- У Воршы маладзён спрабаваў правесці адзіночны пікет
- Беларусы – пра эфектыўнасць пікетаў
- На Гарадзеншчыне жыхарам паселішча не трапіць ні на працу, ні на вучобу
- Вяскоўцы наракаюць на якасць вады
Глядзіце праграму «Маю права» цалкам:
Праваабарончую праграму «Маю права» глядзіце кожную сераду а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн або ў закладцы «Праграмы» на нашай старонцы.
