У Мазыры поні завезлі на мясакамбінат і хацелі пусціць на кілбасы

Настасся Палінка трымае прыватную стайню «Конскі рай» у Мазыры. Амаль дзесяць гадоў яна вучыць верхавой яздзе ўсіх ахвотных.

Мае спадарыня Настасся яшчэ адзін кірунак сваёй дзейнасці:

«Іпатэрапія – гэта лячэбная верхавая язда, для рэабілітацыі дзяцей з абмежаванымі магчымасцямі».

Напярэдадні новага года ў стайні з’явілася новая жыхарка – поні Манюня. Яе забралі з бойні. Працаўнікам мясцовага мясакамбінату стала шкада жывёлы, і яны патэлефанавалі Настассі:

«Стан і маральны і фізічны ў яе быў вельмі цяжкі. Хадзіць самастойна яна не магла. З паркоўкі мы яе неслі на руках, – распавяла нам уласніца стайні. – Пяць дзён, якія яна правяла ў нас да прыезду адмыслоўцаў, яна толькі стаяла, яна папросту не магла фізічна рухацца».

Манюня не магла рухацца, бо ейныя капыты былі вельмі недагледжаныя, і яна пакутавала на ламініт. Да такога стану яе давялі на сельскагаспадарчым прадпрыемстве «Зара», дзе разводзяць поні. Настасся Палінка растлумачыла нам прычыну ўзнікнення гэтай хваробы ў коней:

«Ламініт у коней – гэта інтаксікацыя арганізму. Арганізм жывёлы не можа адолець нейкае атручванне, або яе сілкуюць неадпаведнаю ежаю. Тады ідзе разрастанне капытнага рогу».

Адмыслоўцы з Менску зрабілі жывёле расчыстку капытоў. Працэдура цягнулася каля трох гадзінаў. Упершыню за доўгі час Манюня здолела паспаць. Цяпер у стайні «Конскі рай» чакаюць ветэрынара з рэнтгенам, каб даведацца, ці сугломы маленькага каня змогуць аднавіцца. Паводле адмыслоўцаў, аднаўленне ног поні зойме паўгода-год. Пакуль жа новыя гаспадары кормяць Манюню адмысловымі дадаткамі ды патроху вучаць наноў хадзіць. Яўген Палінка, муж Настассі, кажа, што яны пераймаюцца лёсам іншых поні, якія засталіся на прадпрыемстве «Зара»:

«Асноўнае пажаданне, каб падобныя рэчы больш не паўтараліся. Каб кіраўніцтва прадпрыемства звярнула ўвагу на іншых каней, якія яшчэ ў іх засталіся».

Спадар Яўген кажа, што догляд за поні не вымагае вялікіх высілкаў і сродкаў, тым больш ёсць ахвотныя дапамагчы ў гэтай справе:

«Літаральна за сімвалічную аплату – за аплату паліва ў абодва бакі – людзі гатовыя прыехаць і дапамагчы гэтым маленькім коням».

Мы выправіліся на ферму прадпрыемства «Зара», з якой Манюню адвезлі на бойню, каб на ўласныя вочы пабачыць, у якім стане ўтрымліваюцца іншыя поні. Аднак працаўнік фермы, спаслаўшыся на загад дырэктара прадпрыемства, адмовіўся пусціць нашую здымачную групу.

Настасся Жаўрыд, дырэктарка цэнтру «Анімалекс», бачыць у выпадку Манюні парушэнні адразу двух адміністратыўных артыкулаў: парушэнне правілаў ветэрынарна-санітарнага ўтрымання жывёлы і жорсткае абыходжанне з жывёлаю. Каб знайсці вінаватых і прыцягнуць іх да адказнасці, Настасся Жаўрыд раіць, па-першае, звярнуцца да ветэрынара, а па-другое:

«Знайсці адмыслоўца ва ўтрыманні гэтае жывёлы. І ўжо пасля звяртацца ў Міністэрства сельскай гаспадаркі. І другі шлях – звярнуцца да свайго ўчастковага міліцыянта».

Настасся і Яўген Палінкі спадзяюцца, што больш поні з прадпрыемства «Зара» не трапяць на бойню, бо гэтую жывёлу выводзілі зусім для іншых мэтаў.

«Манюня будзе проста часткаю нашай сям’і. Магчыма, будзе суправаджаць іншых коней на прагулцы і атрымліваць асалоду ад жыцця».

Таксама ў праграме «Маю права»:

  • Жыхары дому не могуць дачакацца ад камунальнікаў кампенсацыі
  • У рубрыцы «Ведай свае правы!» – пра абарону спажыўцоў
  • Менчукі – пра спрэчкі з пастаўляльнікамі паслуг
  • Маці вязня распавядае пра ўмовы ўтрымання сына ў турме

Глядзіце праграму «Маю права» цалкам:

Праваабарончую праграму «Маю права» глядзіце кожную сераду а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн або ў закладцы «Праграмы» на нашай старонцы.

Больш матэрыялаў

Звярыная жорсткасць: берасцейцу праламалі чэрап і распачалі супраць яго крымінальную справу

«Нас не замаляваць, не сцерці, не разарваць». Жыхары плошчы Пераменаў працягваюць барацьбу

Улады бяруць у закладнікі дзяцей актывістаў

Былога міліцыянта забралі на Акрэсціна

Мужчына пайшоў у краму – яго ледзь не застрэлілі

Дзіцячаму доктару закідаюць правапарушэнне, якога той не рабіў. Невінаватасць пацвярджаюць камеры відэаназірання

Мужчына праз невыносны боль ходзіць на працу, бо не можа атрымаць інваліднасці

На заводзе пад Петрыкавам людзі паўгода чакаюць заробак