Новаабраны прэзідэнт ЗША Доналд Трамп высунуў на пасаду дзяржаўнага сакратара Рэкса Тылерсана, які ўзначальвае нафтавую кампанію «ЭксанМобіл» (і сябруе з Пуціным). Ён, паводле Трампа, валодае неабходным досведам у сферы бізнесу. Але ці ў дыпламатыі? У эфіры «Белсату» разважае Валер Кавалеўскі з Беларуска-амерыканскага задзіночання.
Навошта Трампу патрэбны Тылерсан? Гэта палітыка ці бізнес?
Трэба сказаць, што кандыдатура Рэкса Тылерсана добра спалучаецца з агульным падыходам Трампа, які падбірае сабе людзей ці то з вайскоўцаў, ці то з бізнес-лідараў, ці то з ліку апанентаў ягоных канкурэнтаў па Рэспубліканскай партыі на прэзідэнцкіх выбарах.
Трамп падкрэслівае, што набірае людзей не з істэблішменту. Але ці не атрымоўваецца так, што ён набірае багацеяў і зусім не шараговых адмыслоўцаў?
Тылерсан адносіцца да вельмі багатых людзей, але назваць яго часткаю істэблішменту нельга. Ён прайшоў шлях ад інжынера да кіраўніка кампаніі, але да Вашынгтону, хоць ён з ім канкуруе, Тылерсан дачынення не мае. Гэта, сапраўды, вельмі новы чалавек для амерыканскага ўраду.
Глядзіце размову Сяргея Падсасоннага з Валерам Кавалеўскім у «Гарачым каментары»