Рэцэпт, які дапаможа перажыць сезон захворванняў

У новым выданні шоу «Я не буду гэтага есці!» распавядаем, як прыгатаваць смачны капусняк – страву, якая разагрэе ў веснавую непагадзь.

У праекце «Я не буду гэтага есці!» вядомыя людзі дзеляцца з намі сваймі кулінарнымі траўмамі: распавядаюць, да якой стравы не могуць дакрануцца і чаму. Задача нашых шэф-кухараў Вольгі Прыгаравай і Аляксандра Чыкілеўскага змяніць рэцэпт так, каб наш герой з’еў усё да апошняй лыжкі ды папрасіў яшчэ. Напрыканцы праграмы госць абірае пераможцу кулінарнай бітвы. І гэтым разам мы накіраваліся ў Кіеў скараць страўнікі ўкраінскіх зорак.

Чарговы наш госць – Канстанцін Грубіч, украінскі «народны журналіст» і вядоўца кулінарных праграм, аўтар аднайменнага YouTube-каналу, прысвечанага ўкраінскай кухні.

«Я не разумею смаку капусняку [па-расейску – шчы, – рэд.]. Некалькі разоў у Маскве каштаваў. Гэта для мяне ўвогуле не страва. Шчы – гэта кісла, нясмачна, бедна», – паставіў крыж на адной з самых папулярных страваў нашых усходніх суседзяў Канстанцін Грубіч.

Затое нашыя шэф-кухары з задавальненнем прынялі выклік.

«Капусняк – гэта другі суп пасля баршчу, які я магу есці. Там шмат інгрэдыентаў і багатая палітра смакаў, – гаворыць Аляксандр Чыкілеўскі. – Капусняк для беларускай кухні – традыцыйны. Назвы ёсць розныя – у розных кутках Беларусі. Часам яго называюць «квас», калі выкарыстоўваюць кіслую капусту».

«Я да мамы заўсёды на «шчы» езджу. З кіслай капусты. Асабліва 1 студзеня – гэта самы ўлюбёны суп», – дадае Вольга Прыгарава.

Пераканаць Канстанціна Грубіча, што капусняк – гэта някісла, смачна і не абавязкова бедна, яна вырашыла сваёй аўтарскай версіяй гэтай стравы.

«Шчы» на грыбным булёне з вэнджанай рабрынкай і сушанымі памідорамі

  • капуста – 1 качан (каля 1 кг)
  • сушаныя белыя грыбы – 300 г
  • вэнджаная грудзінка – 350 г
  • вэнджаная свіная рабрынка – 300 г
  • цыбуля рэпчатая – 200 г (2 шт.)
  • моркаўка – 200-250 г (2 шт.)
  • бульба – 200 г
  • балгарскі перац – 120 г
  • сушаныя памідоры – 100 г
  • часнык – 50 г
  • масла сметанковае – 20 г
  • лаўровы ліст
  • духмяны перац

Для падачы

  • смятана
  • булачкі
  • масла сметанковае, змяшанае з парэзаным часныком і кропам

Варым два булёны: грыбны і на рабрынцы. Цыбулю і моркаўку абсмажваем з вэнджанай грудзінкай. Дадаем перац і памідоры. У мясны булён дадаем грыбны, парэзаную бульбу і капусту. Пасля – абсмажаную агародніну. Напрыканцы – лаўровы ліст і духмяны перац. Падаем з булачкамі, намазанымі часныкова-кропавым маслам.

А вось што прапануе Аляксандр Чыкілеўскі.

Капусняк на трох булёнах з журавінамі

  • капуста – 0,5 кг
  • мясны булён – 0,5 л
  • марынад з-пад кіслай капусты – 0,5 л
  • грыбны булён – 0,5 л
  • вараная ялавічная лапатка – 300 г
  • моркаўка – 150 г
  • цыбуля – 150 г
  • памідоры – 150 г
  • корань пятрушкі – 100 г
  • корань салеры – 100 г
  • сухія грыбы – 50 г
  • гарчыца – 50 г
  • журавіны – 50 г
  • масла сметанковае – 50 г
  • раслінны алей – 50 г
  • мука – 50 г
  • кінза – 50 г
  • смятана – 50 г

Замачыць белыя грыбы на ноч, зварыць да гатовасці. Працадзіць булён. Капусту, цыбулю, моркву, салеру і корань пятрушкі парэзаць саломкай і абсмажыць у рондалі на сумесі сметанковага масла і расліннага алею. Дадаць муку, гарчыцу і абсмажваць яшчэ пяць хвілін. Дадаць марынад з капусты і давесці да кіпення. Пасля дадаць грыбны булён, даць пакіпець, дадаць мясны булён, парэзаныя вараныя грыбы і памідоры без скуркі і семак. Варыць на павольным агні 15–20 хвілін. Дадаць парэзаную кінзу ды кубікі мяса. Паварыць яшчэ 5 хвілін. Падаем са смятанай.

Чый варыянт перамог у кулінарнай бітве? Глядзіце у новым выданні кулінарнага шоу «Я не буду гэтага есці!» (відэа ў пачатку артыкула).

Шоу «Я не буду гэтага есці!» глядзіце штонядзелю а 19:35 паводле менскага часу на тэлеканале «Белсат» праз спадарожнік «Astra 4A» (ранейшая назва «Sirius 4»), онлайн, на YouTube-канале «Белсат Life» або ў архіве на нашай старонцы.

Любіце гатаваць? Сачыце за абнаўленнямі на Facebook, у «Одноклассниках» і ў Instagram.

ІА, belsat.eu

Глядзі таксама

Больш матэрыялаў

Антыкрызіснае меню: пераходзім на субпрадукты

Эмульсія з салёных гуркоў. Беларусы ўмеюць здзіўляць

Як перажыць эпідэмію: замест імпрэзаў застаемся ўдома і вучымся гатаваць

З’ела шніцаль у сталоўцы. І вось якія наступствы

Беларускі далікатэс: суп з бульбянога шалупіння. Яго елі нават у Нясвіжскім замку