Пнеўманія не праяўляецца да апошняга. Другая хваля COVID-19 ужо накрыла Беларусь

Другая хваля каронавіруса – нашмат магутнейшая, чым вясновая. Беларускія медыкі з добрых шпіталяў даюць ёй адпор, але не вывучаная да канца інфекцыя застаецца непрадказальнай і бязлітасна б’е па жыццёва важных органах. Наступствы COVID-19 адчуў на сабе вядоўца ток-шоу «Кожны з нас» Глеб Лабадзенка. Для яго гэтае выданне – спроба папярэдзіць беларусаў пра небяспеку.

Госці студыі, якія таксама нядаўна перанеслі каронавірус, дзеляцца досведам і нечаканымі праблемамі, з якімі можа сутыкнуцца кожны.

Месца для цяжка хворай вызвалілася, бо памерлі іншыя пацыенткі

Дактары з некаторых паліклінік катэгарычна адмаўляюцца накіроўваць хворых на мазкі і КТ. Ставяць у якасці дыягназаў то алергію, то стандартную прастуду. Дабівацца тэстаў даводзіцца з боем, калі тэмпература ўжо не збіваецца, а ў пацыента – двухбаковая пнеўманія. І нават пры такім раскладзе трапіць у больніцу бывае няпроста. Жыхарка Менску Наталля Клімовіч мела 50 % паражэння лёгкіх і літаральна траціла прытомнасць. Але больніца была забітая пацыентамі. Пасля пяці гадзінаў чакання жанчыну адправілі ў палату. І вось чаму.

«Дзве пацыенткі, на жаль, адышлі ў іншы свет. Пра гэта мне распавяла суседка па палаце, – згадвае Наталля Клімовіч. – Таму нас і змаглі шпіталізаваць»

Доктар – пра важныя пытанні аб кароне

Трансфузіёлаг з Горадні Уладзімір Пруднікаў адказвае на шэраг важных пытанняў. Важныя яны яшчэ і таму, што статыстыка шматкроць заніжаецца, а пра падступнасць інфекцыі распавядаюць мала.

  • Чаму пры двухбаковай пнеўманіі ды істотнай паразе лёгкіх чалавек можа не адчуваць небяспекі?
  • Ці можна захварэць на ковід некалькі разоў, і цягам якога часу пасля перанесенай інфекцыі можна пачувацца больш-менш спакойна?
  • У якіх сітуацыях чалавек мусіць біць ва ўсе званы і дабівацца шпіталізацыі?
  • Калі панікаваць не варта і можна лячыцца дома?
  • Якія захады мусіць рабіць кожны з нас, каб засцерагацца ад ковіду?

Памерла маці, а на наступны дзень – ейны сын

Цягам выдання гучаць гісторыі пра цяжкую хаду хваробы ў маладых людзей. Таксама апавядаецца пра трагедыю ў Глыбоцкім раёне, дзе ад каронавіруса памерла 82-гадовая жанчына, а на наступны дзень ейны сын.

Ізалятары – рассаднікі цяжкай хваробы

Дзясяткі тысяч беларусаў сядзяць у ізалятарах пасля акцыяў пратэсту. У тлумных камерах вязням не пакідаюць шанцаў засцерагчыся ад ковіду. Аб праблеме расказваюць людзі, якія з ёй непасрэдна сутыкнуліся. З-за палітычнага крызісу і беспрэцэдэнтнай хвалі гвалту з боку рэжыму каронавірус, нягледзячы на ўражвальныя лічбы заражаных, не робіцца тэмаю нумар адзін. У той жа час абсалютна зразумела, што ставіцца да COVID-19 легкадумна немагчыма.

Праграма «Кожны з нас» выходзіць кожную сераду а 18:35. Глядзіце праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» і на нашай старонцы.

Больш матэрыялаў

Кансэнсус Захаду і Крамля – наступны этап пераўтварэнняў у Беларусі?

Самыя абсурдныя рэпрэсіі: суд у кватэры, школьнікі ды 3-гадовае дзіця ў РУУС

Гістарычны год у храналогіі. Героі і вынікі 2020

Голас пратэставых двароў: чаго не хапае беларускай рэвалюцыі, і які будзе яе новы этап?

Калі самалёт для Лукашэнкі гатовы, то ён абавязкова вылеціць

Экс-памочнік Лукашэнкі пра тое, калі ўсё скончыцца і чаго не стае для перамогі

Татальныя звальненні нязгодных з рэжымам. Да чаго гэта прывядзе?

Забойства Рамана Бандарэнкі. Ці будзе гэтая ахвяра недарэмнай?