«Мяне судзяць за тое, за што і Коласа». Някляеў – пра беларускага класіка і свой апошні прысуд

Разважаючы пра круглую дату з дня нараджэння Якуба Коласа, Уладзімір Някляеў прыходзіць да высновы, што ў Беларусі мала што змянілася.

«Якуб Колас заклаў у падмурак беларушчыны і нашае дзяржавы такі камень, які не выцягнуць нікому. І Беларусь будзе на гэтым падмурку стаяць», – кажа Уладзімір Някляеў.

У каментары адносна постаці беларускага класіка Някляеў звярнуўся да супрацоўнікаў каналу.

«Некаторыя журналісты «Белсату» выказвалі мне шкадаванні і прасілі прабачэння праз тое, што я даў інтэрв’ю менавіта «Белсату». Кіньце вінаваціцца: суд нада мной і арышт – палітычнае рашэнне, якое было б выкананае пры любых умовах – нават калі б я набраў у рот зямлі і нікому нічога не сказаў, – заявіў Уладзімір Някляеў. – Але нават набраўшы ў рот зямлі, я б падзякаваў і журналістам «Белсату», і журналістамі іншых незалежных медыяў за тое што яны робяць, за мужнасць, з якой яны выконваюць свае прафесійныя абавязкі».

10 соднямі арышту Уладзіміра Някляева пакаралі ў сераду. У матэрыялах справы, аказалася інтэрв’ю Някляева «Белсату», дзе той тлумачыў: «Калі ёсць воля бараніць свае правы, то трэба ісці і іх бараніць».

Суд фактычна палічыў гэтыя словы правапарушэннем.

«Сітуацыя ўяўляе небяспеку для грамадства: у Беларусі пачынаюць судзіць не за дзеянні, а за выказванні», – каментаваў паэт прысуд.

На думку Уладзіміра Някляева, рэаліі коласаўскіх часоў працягваюцца ў Беларусі да сёння.

«Надта сурё’зная сітуацыя, каб гуляцца такімі паняткамі, як беларускасць і нацыянальная свядомасць, незалежнасць. Іх трэба або адстойваць, або маўчаць і ў іх не лезці. Пакінуць гэтую справу тым, хто гатовы дзеля гэтага ўсім ахвяраваць. Як ахвяраваў Янка Купала і Якуб Колас, – кажа Уладзімір Някляеў. – Калі мы прыгадаем, ён быў пасаджаны ў турму за ўдзел у сходзе настаўнікаў 9 ліпеня 1906 года. Падставай для ягонага зняволення было нібыта ягонае аўтарства адозвы гэтага сходу. У тае адозве беларусаў заклікалі змагацца за лепшую долю, за волю. Не параўноўваю сябе з Коласам, але на судзе я быў абвінавачаны ў закліку да гэтага ж самага».

Глядзіце поўную размову з Уладзімірам Някляевым у «Гарачым каментары»