Выключыць шэраг артыкулаў, якія датычаць прадпрымальніцкай дзейнасці, ды перастаць канфіскоўваць маёмасць. Ужо гэтым летам Крымінальны кодэкс Беларусі зазнае змены. Замест ранейшай практыкі канфіскацыі ўлады прапаноўваюць даваць вялізныя штрафы – ад трохсот да пяці тысячаў базавых велічыняў. Гэта павінна абараніць правы і інтарэсы сям’і асуджаных. А як будзе на практыцы? Размаўляем з дэпутаткаю Палаты прадстаўнікоў Ганнай Канапацкай.
«У Беларусі закон і практыка яго стасавання – гэта розныя рэчы. Асабліва гэта бачна на прыкладзе эканамічных правапарушэнняў, калі і штрафы, і іншыя санкцыі проста несуразмерныя таму ўшчэрбу, які паўстае ў выніку правапарушэння. Пры гэтым трэба зазначыць, што практыка выключэння канфіскацыі маёмасці як спосабу пакарання ў Беларусі ўжо існуе. Яшчэ ў мінулым годзе Палата прадстаўнікоў адобрыла праект закону, а цяпер гэта закон і аб змяненні адміністрацыйнага кодэксу, дзе гэтая мера пакарання выключаная.
Я ўпэўненая, што выключэнне канфіскацыі будзе спрыяць развіццю інвестыцыйнага клімату і прыцягненню дадатковых рэсурсаў у беларускую эканоміку. Але трэба быць вельмі асцярожнымі. Бо несуразмернасць штрафаў можа стварыць нам шмат непрыемнасцяў…»
Працяг размовы – у сюжэце.
Фота: Aleksiej Witwicki / Forum
