374 долары заробку, моцнае скарачэнне насельніцтва ды закрыццё школаў, усё горшая даступнасць медыцыны і новага жытла. Гэтак жыве горад, які Лукашэнка назваў «беларускім раем»:
«Нам дзівіцца ўвесь свет, калі госці прыязджаюць, асабліва да вас сюды: божа мой, у рай патрапілі. Вось я ўжо другі раз за апошні тыдзень трапляю ў рай: адзін раз у Старых Дарогах».
Нават страшна ўявіць, як жа тады жыве беларускае пекла. Дарэчы, у Іўе гарант стабільнасці і міру прывёз дождж, навучыў мясцовых чыноўнікаў правільна нарыхтоўваць кармы і наведаў некалькі мясцовых прадпрыемстваў. Пасля чаго вельмі расчуліў сваймі прамовамі тутэйшую моладзь, падарыўшы шакаладкі.
****
Старшыня Цэнтрвыбаркаму Лідзія Ярмошына заявіла, што празрыстыя скрыні для галасавання – гэта ўжо не модна:
«Сразу же могу сказать: не модно это уже. Более того, противоречит международным стандартам. Модны полупрозрачные ящики, модно применять (по крайней мере, частично) электронное голосование».
Ды модна не фальсіфікаваць выбары, але ж модніца Ярмошына бачыць толькі тое, што ёй хочацца бачыць.
«Я не знаю, что происходит в других странах, честно говоря», – казала яна ў 2006-м.
Мы ж запыталіся ў менчукоў: а ці модныя яшчэ самі выбары? Або лепш было б іх адмяніць ды зэканоміць вялікія грошы?
«Ну канешне, грошы лепш зэканоміць».
«Я б лепш зэканоміла грошы. Бо ў бюджэце, як вы ведаеце, грошай ужо і няма».
«Ну, напэўна, як дзяржава вырашае, гэтак, напэўна, і трэба. Мы не ведаем».
«У прынцыпе, з улікам таго, што ў нас выбары адбываюцца раз на пяць гадоў і сітуацыя не змяняецца, то можна, у прынцыпе, грошы пусціць на патрэбную справу».
Калі ж выбары не адмяняць, а замяніць на электроннае галасаванне – колькі б галасоў здолеў набраць Лукашэнка?
«Калі сярод моладзі, то мабыць нуль».
«Моладзь – больш за 60 адсоткаў прагаласуе. Яна больш прасунутая ў гэтым сэнсе».
«Думаю, і ў інтэрнэце няма ніякіх праблемаў што-небудзь накруціць і што-небудзь скруціць».
«Менш. Колькі адсоткаў – не ведаем, але людзі б менш абралі па інтэрнэце».
«Напэўна, менш галасоў, таму што моладзь зараз больш прасунутая».
А таму калі і прасоўваць нейкія інавацыі, то хіба што ўводзіць галасаванне праз пошту. «Белпошта» – дакладна не падвядзе!
****
Дайджэст іншых важных навінаў:
«Надо наслаждаться жизнью, пока не поздно» – піша галоўная газета краіны Саўбелка.
А таксама ў выданні – чаму Беларусь будзе рамантаваць самалёты NATO ды навошта ў Менску з’явіўся шэрынг паўэрбанкаў.
Сцяпан Святлоў, belsat.eu
Калаж з фота: Nikolai Petrov / BelTA / TASS / Forum