93 дні – да прэзідэнцкіх выбараў! Шосты раз улады прапануюць беларусам абраць… Аляксандра Лукашэнку. Ужо чвэрць стагоддзя ён кіруе нашаю краінаю, за гэты час мы не сталі больш заможнымі, не запусцілі ракетаў у космас, не вырваліся ў лідары ні ў навуцы, ні ў эканоміцы, ні ў адукацыі, ні ў медыцыне… ні ў чым.
Але цяпер усё будзе па-іншаму. На шосты тэрмін Лукашэнкі абяцаюць прарыў… па ўсіх франтах, нарэшце мы ўсяму свету пакажам «кузькаву маці» ды дамо перцу з імберцам! І гэта не пустаслоўе! Найлепшыя розумы краіны паказалі Лукашэнку айчынныя дасягненні. Вось яны. Гэта толькі здаецца, што гэта – абы-што. Насамрэч гэта ого-го!
– Гэтае аўта – мы лічым, што мы на ім зможам спаборнічаць з «Тэслай». І гэта мы абсалютна шчыра заяўляем.
– Рухавікі чые?
– Магілёўскія.
Што там аўты! Беларусы вынайшлі трохколавыя ровары!
– Гэты трохколавая мадэль на ўзмоцненай раме стальной з незалежным…
– Гэта як ровар?
– Так!
А гэта айчынныя хуткасныя суперскутары!
– Які запас хады?
– Максімальная хуткасць да 60 км/г.
З такімі хуткасцямі мы ўсіх пакінем ззаду.
– Паспрабаваць цікава. Ок?
І нарэшце мега-супер-крутое вынаходніцтва!
– Тут вы бачыце першы ў свеце ў дадзеным класе ваенна-ўдарны верталёт.
Яшчэ і не тое будзе!
«Да лета мы вам пакажам сапраўдны верталёт. Блізкі аналаг ёсць толькі ў амерыканцаў. Уяўляеце сабе: мы такая маленькая краіна, а ўзровень маем, які сабе могуць дазволіць толькі адзінкі».
І сапраўды, іншыя краіны свету не могуць сабе дазволіць вырабляць нешта не з мэтаю зарабіць, а толькі дзеля таго, каб паказаць гэткі цуд прэзідэнту!
«Перспектыў іх баявога ўжывання я не ведаю, нідзе не бачыў. Ёсць плюсы беспілотных верталётаў праз іх манеўранасць на нізкіх хуткасцях, але нават у выведцы, я шчыра кажучы, пакуль не ведаю», – кажа Ягор Лебядок, ваенна-палітычны аглядальнік.
Хаця калі пастарацца, то і гэтаму цуду можна знайсці выкарыстанне.
«Гэтая труба, якую ў нас дэманструюць для выкіду гранатаў, зразумейце, гэта не для вайсковага выкарыстання, гэта для тэрарыстычных аперацый або сілаў спецпрызначэння. Для войска гэта немэтазгодна, таму ў войска яны не трапляюць», – адзначае аналітык.
Галоўнае, што трапяць у спіс дасягненняў кіравання Лукашэнкі. Беларусаў, якія і так нацярпеліся, Лукашэнка папрасіў пацярпець яшчэ месяц! Вось яна – новая антыкаронавірусная парада ад Лукашэнкі:
«Калі ты ўжо цалаваўся з кімсьці, дык цалуйся далей. Ня лезь там, калі ты мужык, да іншай жанчыны. Ну пацярпі месяц. Калі ты дзесьці цёрся там у сям‘і, застанься ў сям‘і».
Дзе і з кім труцца беларусы, мы запыталіся ў жыхароў Глыбоччыны:
«Ёсць прыстойныя беларусы, якія захоўваюць сем‘і, а ёсць такія, якія бяруць з некага прыклад».
«Гэта ж грэх – хадзіць да палюбоўніцы!»
«Цяпер імкнуцца ў сям‘і неяк».
«Маладыя можа і ходзяць».
«Беларусы адданыя сямейнікі, толькі дома!»
«У мяне ёсць свая жанчына, таму нікуды не хаджу».
«Ходзяць, у мяне на працы ўсе ходзяць».
Ці гатовыя гэтыя труны месяц пацярпець?
«Месяц цярпець і не цалавацца – гэта ж сем‘і парушацца».
«Я ўсё жыццё жыву з сям‘ёю».
«Усё правільна, калі такі стан у краіне, трэба засцерагацца».
«Не, хто гэта сказаў, той хай і цярпіць!»
Уласна, ці будзе цярпець Лукашэнка, які нязменна, ужо 45 гадоў у шлюбе з адною жанчынаю! І з дзецьмі … не ўсімі ад яе…
«У яго шмат там гэтых усялякіх там каханак. Яму цярпець не трэба. Іх усіх там правераць, і ён сходзіць да каго трэба».
«Можа і пацярпець, ён жа ў нас немалады хлопец».
«Як я паглядзела як яго на суботніку атачалі маладыя дзяўчаты, думаю, не!»
«Думаю будзе!»
«Ён так, вытрыманы мужык!»
«Мяне цікавіць іншае, што ў нас не Мінздароўя дае рэцэпты, а галоўны кіраўнік: то козачкі ў яго народзяцца, то ён на трахцеры, 100 грам пацягнуць»…
«Нам нельга!»
І журналістам таксама шмат чаго нельга… Гэтак Змітра Лупача адразу пасля запісу гэтага апытання затрымалі, у ізалятары ён будзе чакаць суда, які мае адбыцца ў панядзелак.
Вольга Старасціна, «Суб’ектыў», «Белсат»
Калаж з фота: Міністэрства абароны Рэспублікі Беларусь