Кідаюць партнёры і будаўнікі: што ўражвае замежнікаў у Беларусі



Беларусь уражвае замежных бізнесоўцаў лянотаю будаўнікоў і гіганцкім папяровым дакументаабарачэннем. Самыя вялікія бухгалтэрыі – у беларускіх офісах. Аднак замежнікі гатовыя з гэтым працаваць, бо на нашым рынку мала моцных канкурэнтаў.

«Я сутыкнулася з беларускімі будаўнікамі. Гэта было нешта. Гэта было здзіўленне. Бо ў Нямеччыне робяць хутка і пад ключ. І не трэба над імі стаяць: Ну вы як? Вы зробіце? Вы сапраўды зробіце?» – узгадвае свае эмоцыі Агата Сідаровіч, дырэктарка дзіцячага садка «EICHHÖRNCHEN».

Агата прыехала ў Менск з Берліну, яна псіхолаг, жонка беларускага бізнесоўца і жыве ў Беларусі ўжо сем гадоў. Год таму яна адкрыла тут першы нямецкі дзіцячы садок. Спачатку збіралася арандаваць для садка катэдж у Цнянцы. Але ў апошні момант, калі Агата ехала ўжо падпісваць дамову, гаспадыня нечакана перадумала. І паведаміла пра тое праз sms.

У Нямеччыне, калі людзі дамовіліся, значыць, – дамовіліся. А ў Беларусі Агаце давялося на пачатку навучальнага года тэрмінова шукаць іншае памяшканне і рабіць там рамонт. Тады Агату і ўразіла лянота беларускіх будаўнікоў. Знайсці выхавацелек спачатку таксама было не проста.

Агата і самая нетрадыцыйная кіраўніца. З групаю на 14-ць дзяцей у яе працуюць чатыры выхавацелькі ды астэапат. Агата працуе з імі побач, а не ў кабінеце, і вельмі любіць нашую традыцыю піць гарбату на працы. Кажа, што гэта вельмі збліжае.

Кампанія дастаўкі ежы «MENU.BY» прыйшла на беларускі рынак два гады таму пасля старту аналагічных праектаў у Арменіі ды Грузіі. І першае адрозненне ад іншых краінаў – вельмі шмат бюракратычнай працы. Каб падрыхтаваць кур’ера да працы, у Арменіі патрэбныя толькі торба і ўніформа.

«Што мы даем тут: торба, уніформа, тэхагляд, медагляд, санпашпарты, медагляд, які ён сам павінен прайсці і прынесці нам гэтую даведку, што ён прыдатны. Закупляем яму касу, тэрмінал і пускаем у ход», – пералічвае ўсё патрэбнае Ануш Нэрсісян, дырэктарка кампаніі «MENU.BY».

У Менску самы вялікі аддзел у кампаніі – бухгалтэрыя. Бо трэба апрацоўваць вялікую плынь папяровых дакументаў. Бухгалтарам ужо не стае месца ў старым офісе, і кампанія пераязджае ў большы.

Дырэктарка адзначае, што ў Беларусі, у адрозненне ад Арменіі і Грузіі, перад падпісаннем дамовы вельмі доўга вывучаюць дакументы, абмяркоўваюць у іх кожную літару. Гэта вельмі зацягвае працу. Любая дамова, якую ў іншай краіне яны могуць заключыць за тыдзень, тут займае месяцы.

У той жа час Ануш лічыць, што ў нас больш гарантыяў ад свавольства з боку дзяржавы, калі ты сумленна працуеш. А вось падаткі тут нашмат вышэйшыя. І трымаць чалавека ў штаце значна даражэй.

Галоўны офіс міжнароднага медыяканцэрну «Шыбстэд» месціцца ў Осла. У нас канцэрну належыць інтэрнэт-пляцоўка абвестак «Куфар». Ува ўсіх краінах, дзе працуе, кампанія запусціла сэрвіс «Бяспечная ўгода».

За выключэннем Тунісау і Беларусі. Сутнасць угоды ў тым, што плата за тавар адбываецца онлайн праз інтэрнэт-пляцоўку, а тая замарожвае грошы ў сябе, пакуль пакупнік не пацвердзіць, што тавар адпавядае абвестцы.

«Цяпер у нас такой магчымасці няма, бо на заканадаўчым узроўні, каб так рабіць, мы мусім стаць фінансаваю арганізацыяй або банкам, – тлумачыць нашыя асаблівасці Арцём Рабцэвіч, дырэктар пляцоўкі «Куфар».

Аднак дырэктар адзначае, што ёсць у Беларусі і плюсы. Напрыклад, малая канкурэнцыя: тут няма такіх моцных гульцоў, як, напрыклад, «Facebook marketplace». Да таго ж, беларускі рынак толькі пачаў развівацца, і замежныя кампаніі могуць уплываць на яго развіццё. І такі патэнцыял перамагае ўсе мінусы ад працы ў Беларусі.

Праграма «Асабісты капітал» цалкам:

Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце.

Далучайцеся да нашых старонак ў Facebook ды Одноклассниках.

Падпісвайцеся на нашу рассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».

Больш матэрыялаў

У Беларусі патрэбны цэнтр для крызісных сітуацыяў

«Беларусь паступова ператворыцца ў Прыднястроўе». Што выратуе эканоміку?

Колькі плацяць беларусы за міліцэйскі гвалт?


Грошы скончыліся. Як выжыць без іх?

«Каму гэтая інфармацыя што дасць?» Як ад беларусаў хаваюць сапраўдны маштаб эпідэміі

Грошы на чужой бядзе. Хто нажываецца на эпідэміі?

Новая нармальнасць. Якой будзе Беларусь пасля пандэміі?

Каронакрызіс. Параўналі дзяржаўную дапамогу ў Беларусі ды іншых краінах