«Гэты памёр, тую выкінулі з 9-га паверха», – беларусы пра жыццё ў камуналцы

На пачатку XXI стагоддзя ў Беларусі ў камуналках жыло больш за 15 з паловаю тысячаў сем’яў. Колькі іх цяпер – невядома. Афіцыйнага ўліку камунальных кватэраў цяпер не вядуць. А людзі, якія загразлі ў мінулым, чакаюць, што на іх звернуць увагу да таго, як абваляцца сцены іхных дамоў.

«Сем’і пасыходзілі, засралі хату», – распавядае Аркадзь Самсончык, які жыве ў камунальнай кватэры.

Спадару Аркадзю – 78 гадоў, 17 з іх ён жыве ў камунальнай кватэры. Разам з грамадзянскаю жонкай і ейнаю маці. Апошняя некалі і атрымала пакой у менскай камуналцы. Дом пабудавалі яшчэ ў 50-ыя. Спачатку там было шумна і весела, у кватэры жыло 5 сем’яў. Праўда, жыхары ўвесь час мяняліся. Надоўга ў камуналцы, дзе кухня, калідор і прыбіральня – агульныя, ніхто не жадаў затрымлівацца.

«Адзін памёр, другую – выкінулі з дзявятага паверху. Я ў ейным пакоі цяпер жыву, той нябожчыцы. Мы засталіся, маці давай плаціць за ўсіх, так і плоціць. І ім пофіг, абы плацілі», – распавядае жонка Аркадзя.

Ахвотных заехаць у камуналку больш не знайшлося, і чальцы сям’і сталі паўнавартаснымі гаспадарамі 90 квадратаў. Замест аднаго пакою ў іх аказалася цэлых 5. Двума з іх Аркадзь і Аксана ніколі не карысталіся. Там нават вокнаў няма. Сямʼі прапанавалі прыватызаваць жытло, але ў пенсіянераў не знайшлося грошай. Таму цяпер за камунальныя метры, якія набылі статус арэндавых, яны плоцяць 200 рублёў штомесяц.

«Во, бабка мая, памірае, ляжыць. Ну што, я яе ў тазік пасаджу, калі яна ні туды, ні сюды? Так бы хоць ванну, хоць на руках занеслі», – разважае Аксана Ходас.

Гарачай вады няма. Аркадзь з Аксанаю, каб памыцца, ездзяць да знаёмых, а 90-гадовая бабуля не была ў душы ўжо некалькі гадоў – з таго часу, як не падымаецца. Сям’ю шмат разоў залівалі суседзі: пра гэта нагадвае чорная столь. Па драўлянай падлозе страшна хадзіць. Ці не праваліцца яна часам? Паводле закону надзённы рамонт у камуналках за свае сродкі мусяць рабіць уласнікі. Калі ж у кватэры іх некалькі, то кошт рамонту агульных тэрыторыяў дзеліцца на ўсіх зарэгістраваных.

«Некалькі жыхароў або адзін жыхар можа зрабіць надзённы рамонт у памяшканнях агульнай уласнасці. І потым у судзе патрабаваць спагнання ад астатніх суўласнікаў сувымерна з займанаю плошчай той часткі панесеных выдаткаў, якія былі выдаткаваныя», – каментуе адвакат Аляксандр Філановіч.

Юрый – сусед Аркадзя і Аксаны. Пакой ён набыў у 2000 годзе за 5500 тысячаў долараў. Кажа, што нават уявіць сабе не мог, у які жах ператворыцца ягонае жыццё. У іхнай камунальнай кватэры – 6 пакояў. Колькі тут цяпер жыве чалавек, мужчыну нават падлічыць цяжка: недзе каля дзясятка.

«Кожны ўстае прыкладна з 7 да 8 раніцы. Натуральна, свае патрэбы трэба неяк спраўляць. Унітаз мянялі за свой кошт. Прыбіральня – адзіная для ўсіх», – распавядае Юрый Сілівёрстаў.

Бальшыня гаспадароў здае свае пакоі. Таму ў кватэры яны з’яўляюцца рэдка або наагул сустракаюцца з наймальнікамі на нейтральнай тэрыторыі. Дамовіцца з імі аб супольным рамонце ў Юрыя не атрымліваецца. Тым жа, хто здымае пакоі, рамонт не патрэбны. У мужчыны, які працуе простым будаўніком, грошай, каб самастойна адрамантаваць кватэру, няма.

Усе трубы згнілі, паўсюдна вільгаць і грыбок. Праводка ўвесь час прыходзіць у нягоднасць. Там ніколі не рабілі капітальнага рамонту. Юрый кажа, што абяцанкі ад дзяржавы чуў яшчэ 18 гадоў таму. Але ў камуналцы з таго часу нічога не змянілася.

Паглядзіце, як выглядаюць гэтыя камунальныя кватэры, у сюжэце!

Таксама ў праграме «Асабісты капітал»:

  • «Каб пражыць, ашчаджаю нават на цяпле» – беларусы пра свае пенсіі
  • Красці нельга, а не плаціць падаткі – можна. Каштоўнасці беларусаў
  • У ЗША беларускія свечкі купляюць за 50 долараў, а ў нас не бяруць і за 10: бізнесоўцы пра імпартазамяшчэнне

Праграма «Асабісты капітал» цалкам:

Глядзіце праграму «Асабісты капітал» кожны панядзелак а 19:00 на тэлеканале «Белсат», а таксама онлайн на нашым сайце.

Далучайцеся да нашых старонак ў Facebook ды Одноклассниках.

Падпісвайцеся на нашу рассылку і раз на месяц вы будзеце атрымліваць ліст з чатырма найбольш карыснымі сюжэтамі «Асабістага капіталу».

Больш матэрыялаў

У Беларусі патрэбны цэнтр для крызісных сітуацыяў

«Беларусь паступова ператворыцца ў Прыднястроўе». Што выратуе эканоміку?

Колькі плацяць беларусы за міліцэйскі гвалт?


Грошы скончыліся. Як выжыць без іх?

«Каму гэтая інфармацыя што дасць?» Як ад беларусаў хаваюць сапраўдны маштаб эпідэміі

Грошы на чужой бядзе. Хто нажываецца на эпідэміі?

Новая нармальнасць. Якой будзе Беларусь пасля пандэміі?

Каронакрызіс. Параўналі дзяржаўную дапамогу ў Беларусі ды іншых краінах