Экс-вядоўцы дзяржаўных каналаў апавядаюць пра закуліссе прапаганды

Паводле афіцыйных звестак, навагодні зварот Аляксандра Лукашэнкі глядзелі больш за 6 мільёнаў чалавек. Ці перахапілі ініцыятыву ў інфармацыйнай вайне дзяржаўныя медыі? Высвятляем у праграме «Шчыра кажучы».

Падчас паслявыбарчых пратэстаў сысці з «Белтэлерадыёкампаніі» давялося тэлевядоўцы Кацярыне Пытлевай. Прычынаю канфлікту з начальствам стаўся пост у Instagram, у якім журналістка асудзіла жорсткія затрыманні мірных дэманстрантаў яшчэ ў перадвыбарчую кампанію. Кацярына была не адзінаю працаўніцаю БТ, каго згаданы факт абурыў. Не пажадаў выдаваць у эфір аднабокай інфармацыі аб пратэстах у Беларусі ўжо былы вядоўца навінаў Сяргей Казловіч. Паводле тэлежурналіста, 10 жніўня ён падышоў да кіраўніцтва з просьбай часова адхіліць яго ад эфіраў. Але яму запрапанавалі напісаць заяву на звальненне.

«Здарылася такая вясёлая гісторыя, калі я, атрымаўшы разлік, зразумеў, што ліпень і пачатак жніўня ў эфіры працаваў бясплатна. Рэч у тым, што мой асноўны заробак складаецца галоўным чынам з прэміі, і гэтай прэміі мяне не пазбавілі, але зрабілі яе мінімальнаю – 10 рублёў», – апавядае былы вядоўца Сяргей Казловіч.

Хваля пратэстаў не абышла і іншых рэспубліканскіх тэлеканалаў. Пасля абвяшчэння вынікаў выбараў у эфір адмовілася выходзіць тэлевядоўца СТВ Таццяна Бародкіна. Журналістка пачала актыўна выказваць сваю грамадзянскую пазіцыю ў сацыяльных сетках. Неўзабаве ёй сталі паступаць пагрозы. У тым ліку ад знаёмага з КДБ. Дзеці Таццяны былі моцна напалоханыя. Сям’я пастанавіла з’ехаць з краіны.

«Потым ужо пайшлі канкрэтныя пагрозы, што заўтра прыедзе ўжо не ён, а іншыя людзі, што забяруць маіх дзяцей, што спаляць мой дом. Ён шпацыраваў у двары, узяў на рукі маю малодшую дачку і пры ёй гэта ўсё казаў. […] Калі мы ўжо былі ва Украіне, Саша вельмі моцна баялася. Яна нават у прыбіральню толькі за ручку хадзіла, спала толькі са святлом. Яна ўвесь час трымала мяне за нагавіцы, за кашулю. Мабыць, падзейнічалі словы, што ў мяне забяруць дзяцей. Было страшна. Яна нават пару разоў абмачылася, нягледзячы на свой узрост пяцігадовы. Ёй было страшна. А вось калі мы ўжо былі на тэрыторыі Польшчы, старэйшая ўжо пачала разумець, што мы не вернемся цяпер ніяк. І вось тады ўжо яе накрыла», – згадвае Таццяна Бародкіна.

Таксама ў праграме «Шчыра кажучы»:

  • Як паўстаў YouTube-праект «Я здымаю» і хто яго стварае.
  • Як цэнзураваліся прыватныя старонкі ў сацсетках працаўнікоў тэлеканалу «Мир».
  • Дзяржаўная ўзнагарода ці кляймо?

Калаж з фота: Natalia Fedosenko / TASS / Forum

Belsat.eu

 

Больш матэрыялаў

Які сапраўдны рэйтынг Лукашэнкі пасля рэвалюцыі

«Занадта вялікі кошт за размаляваныя шчыты АМАПу»

Каму ідзе дапамога фондаў?

Як Дзень Волі можа выратаваць ад прыходу «русcкого мира»

Жыццё за кратамі: як выжыць у турме

Гумарам па дыктатуры: «У Беларусі пераможа смехавая рэвалюцыя»

«Прававы дэфолт азначае, што закон нас не абараняе». Як Лукашэнка знішчае ІТ-краіну

Горад сонца: як прыбліжаныя да Лукашэнкі бізнесоўцы мяняюць ландшафт сталіцы