Берасцейскае «Дынама» рыхтуецца да сезону

Футбольны чэмпіён краіны выйшаў з адпачынку і пачаў рыхтавацца да новага сезону. Мы наведалі адно з першых трэнаванняў берасцейскага «Дынама» на клубнай базе ў Чырвоным Двары.

У берасцейцаў – новы галоўны трэнер. Чэха Марцэла Лічку змяніў Сяргей Кавальчук, які не першы раз бярэцца за «Дынама». Дапамагаць яму будуць, акрамя Андрэя Пракапюка і трэнера галкіпераў Васіля Хамутоўскага, Дзмітрый Мазалеўскі, Сяргей Лапіцкі ды іспанец Франсіска Балягер. Але, паводле трэнерскага штабу, гульнёвы стыль каманды не зменіцца.

«Я думаю, вялікіх зменаў не будзе. У нас дастаткова кваліфікаваная каманда. Нават калі браць мінулы сезон, большасць камандаў супраць нас гуляла з пазіцыі абароны. Таму мы будзем старацца больш атакаваць, больш гуляць на атаку, больш ствараць моманты і радаваць заўзятараў прыгожай яркай гульнёй», – кажа Андрэй Пракапюк, старэйшы трэнер ФК «Дынама» (Берасце).

Адным з самых прыкметных здабыткаў «Дынама» поруч з украінцам Яўгенам Хачэрыдзі стаў паўабаронца, албанец Эліс Бакай, які яскрава праявіў сябе ў салігорскім «Шахцёры», а цяпер хоча перамагаць на новым месцы:

«Вядома, выгуляць чэмпіянат зноў, трапіць у групу Лігі чэмпіёнаў або Лігі Еўропы. Выгуляць Суперкубак і Кубак краіны. Цяпер трэба старанна працаваць над гэтым і рыхтавацца да першага матчу за Суперкубак».

Ёсць у камандзе і страты. Перш за ўсё гэта капітан каманды Павел Няхайчык, які вярнуўся ў БАТЭ, Аляксей Хабленка, які стаў гульцом украінскага «Дняпра-1», і галкіпер Аляксандр Гутар, які з’ехаў у салігорскі «Шахцёр». Ролю першага брамніка на сябе гатовы прымераць малады Павел Паўлючэнка, і перабраўшыйся з менскага «Дынама» Сяргей Ігнатовіч.

«Нічога, у нас ёсць трэнер брамнікаў Васіль Хамутоўскі, які застаецца працаваць. Саня Навумовіч ёсць, Сяргей Ігнатовіч будзе працаваць. Я Сашы Гутару жадаю ўдачы ў новым клубе», – гаворыць Павел Паўлючэнка, галкіпер ФК «Дынама» (Берасце).

Яшчэ адзін навабранец, Кірыла Пячэнін з Віцебску, які можа згуляць на любой пазіцыі злева, кажа, што ўмовы, якія ён атрымаў у Берасці, нельга і параўноўваць з тымі, якія меў у мінулым клубе:

«Вельмі істотна адрозніваецца і адміністрацыйнай базай, і колькі людзей усё робяць, усё на вышэйшым узроўні», – каментуе Кірыла Пячэнін, абаронца ФК «Дынама» (Берасце).

Развіваць сваю кар’еру прыехаў у Берасце і малады нападнік Яўген Шаўчэнка. Былы гулец клубу «Менск» у «Дынама» ставіць перад сабой высокія мэты:

«Забіваць галы, дапамагаць камандзе, перамагаць, хачу стаць чэмпіёнам, бо няма ніводнага ні Кубка, ні чэмпіянату. Хочацца адчуць, што гэта такое».

З сёння «Дынама» працуе на першым турэцкім зборы, на якім згуляе з украінскім «Марыупалем» і кіеўскім «Дынама», славацкім «Слованам» і расейскаю камандаю «Крылья Советов». У лютым берасцейцы вернуцца дадому, каб прыз тыдзень зноў адправіцца ў Турэччыну. А ўжо 4 сакавіка «Дынама» адкрывае сезон матчам за Суперкубак супраць салігорскага «Шахцёра».

Алесь Ляўчук belsat.eu

Глядзі таксама

Больш матэрыялаў

Як зразумець, што СМІ вам хлусяць?

МАЗ ці БелАЗ. Хто раздавіў эканоміку?

Алена Захаранка сустрэлася з удзельнікам забойства бацькі

Замовіў гарбату па-беларуску – выйшаў міжнародны скандал

Леў Марголін: З Лукашэнкам дамаўляюцца толькі тыя, хто завозіць сюды мільёны

Павел Сапелка: Заканадаўства не дазваляе вязням рэалізоўваць свае правы чалавека

Што ўратуе айчынную эканоміку?

Беларускі кіберспорт: прафесійны і жорсткі

Беларускі рубель абваліўся праз нафту