Цягам сезону каманда «Давайце разбірацца» расследавала асобныя карупцыйныя схемы ў розных галінах беларускай эканомікі. Цяпер мы сабралі кавалкі мазаікі ў агульную карціну ды атрымалі ўяўленне, куды ідуць асноўныя грашовыя плыні, незаконна выпампаваныя з бюджэту, і дзе сядзяць іх канчатковыя бенефіцыяры. Як адмываюцца дзяржаўныя мільёны ды як на нашыя расследаванні адрэагавалі іх фігуранты? Глядзіце ў праграме «Давайце разбірацца».
Рэакцыі фігурантаў
Па выніках гэтага сезону расследаванняў мы атрымалі тры разгорнутыя рэакцыі ад нашых фігурантаў. Адныя з іх вінавацілі нас у некарэктнасці. Іншыя проста спрабавалі падрабязна прэзентаваць свой бок. Паколькі ў відэафармат нашай праграмы цалкам іхныя адказы не змясціліся, мы прыводзім гэтыя рэакцыі ніжэй, з нашымі каментарамі.
«Распіл» на рэканструкцыі «Дынама»
Гэтак, Будтрэст № 1 у адказ на нашае расследаванне пра рэканструкцыю «Дынама» звінаваціў нас у маніпуляцыях. Па-першае, на думку дзяржаўнай арганізацыі, некарэктна параўноўваць кошт стадыёну «Дынама» з падобнаю пляцоўкаю – стадыёнам «Альянц» у Вене, які абышоўся ўтрая танней. У прыклад яны прыводзяць шэраг іншых еўрапейскіх стадыёнаў, чыя будоўля каштавала яшчэ больш за рэканструкцыю «Дынама». Праз спасылку ніжэй можна прачытаць поўны тэкст звароту Будтрэсту і каментар журналіста by.tribuna.com, які тлумачыць, што прыведзеныя прыклады не аспрэчваюць нашага расследавання а, наадварот, яго пацвярджаюць.
Таксама ў той жа спасылцы Будтрэст адмаўляе дачыненне свайго менеджара – намесніка генеральнага дырэктара Андрэя Мархеля – да прыватнай фірмы «БелБудРэканструкцыя», якая атрымлівае ад Будтрэсту № 1 шматмільённыя падрады з 2016 года да сёння. Больш за тое, яны ўказваюць, што супраць Андрэя Мархеля распачалі крымінальную справу, але суд яго апраўдаў. З нашых каментароў да гэтых адказаў вы аднак зразумееце, што пэўныя сувязі паміж кіраўніцтвам Будтрэсту і яго прыватнымі падрадчыкамі застаюцца.
Поўны тэкст звароту Будтрэсту № 1 у рэдакцыю «Белсату» і нашыя да яго каментары можна пачытаць тут.
Беларускі фармагедон
Кіраўніцтва фармацэўтычнага прадпрыемства «Націвіта» ў часе нашага расследавання пра кошты супрацьракавых лекаў, якія вышэйназваная фірма пастаўляе «Белфармацыі», ад каментара на камеру адмовілася, аднак свой погляд на сітуацыю працаўнікі выклалі ў лісце, які знойдзеце праз спасылку ніжэй.
Так, прадстаўнікі «Націвіты» прызналі, што прадукуюць джэнэрыкі, на якія не праводзілі біяэквівалетнасці (даследавання на бяспечнасць). Акрамя гэтага, мы прасілі патлумачыць кошты закупаў, па якіх ажыццяўляліся пастаўкі «Белфармацыі» ды якія ў некаторых пазіцыях перавышаюць раздробныя кошты ў 13 разоў. Аднак адказ нам на гэтыя пытанні кіраўніцтва «Націвіты» даць так і не здолела.
Поўны тэкст адказу «Націвіты» на нашыя пытанні і нашыя да яго каментары можна пачытаць тут.
Пункт гледжання залежыць ад месца сядзення
Падчас нашага расследавання, прысвечанага забудове ў цэнтры сталіцы, што ажыццяўляецца з парушэннямі заканадаўства ды інтарэсаў грамадзянаў, мы накіравалі ліст у фірму «Лект». Яна пабудавала офісны будынак, а паркоўку пад яго патрэбы пастанавіла пабудаваць у санітарнай зоне і адначасова на тэрыторыі каля дому, пад вокнамі шматпавярховіку.
Размаўляць пры асабістай сустрэчы кіраўнікі «Лекту» катэгарычна адмовіліся, аднак ужо пасля здачы праграмы даслалі нам ліст. У якім адзначылі, што дазвол на будоўлю атрымалі ад Менскага гарвыканкаму 21.11.2018. Супаставіўшы дакументы, якія мы мелі, стала відавочна, што дазвол выдаваўся ў абыход заканадаўства. А змены ў дэталёвы план будаўніцтва, у якім будоўля паркінгу не прадугледжвалася, уносіліся постфактум, ён змяняўся пад патрэбы бізнесоўцаў. Змянялася пад патрэбы бізнесоўцаў і заканадаўства. Так, праект ухвалілі ў абыход будаўнічых нормаў.
Поўны тэкст адказу «Лекту» на нашыя просьбы пракаментаваць сітуацыю і нашыя да яго каментары можна паглядзець тут.
Новыя расследаванні праграмы «Давайце разбірацца» глядзіце кожны другі чацвер а 19.05 на тэлеканале «Белсат» праз спадарожнік «Астра 4 A» (ранейшая назва «Sirius4»), онлайн або ў закладцы «Праграмы» на нашай старонцы.
Фота на прэв’ю: VASILY FEDOSENKO / Reuters / Forum
