Ахова гіпермаркету «Карона» зноў трапіла ў скандал з пакупнікамі

Ахова менскага гіпермаркету «Карона» ужо не першы раз робіцца героем скандалаў з пакупнікамі. Апошні выпадак здарыўся напрыканцы студзеня.

Іван Цырульнікаў разам са сваім сабачкам 21-га студзеня прыехаў да гандлёвага цэнтру «Карона» ў Менску.

«Я не захацеў пакідаць Бусю ў машыне, каб яна не змерзла. Але на рукі я яе не мог узяць, бо на ўваходзе была слота, і яна запэцкала лапы, – прыгадвае той дзень спадар Іван. – Пабачыў, што на першым паверсе прыбіральня зачыненая, і накіраваўся на другі паверх».

Калі мужчына прайшоў амаль увесь другі паверх па коле, да яго падышоў ахоўнік і запатрабаваў тэрмінова пакінуць гандлёвы цэнтр.

«Я вельмі здзівіўся, сказаў, што не гатовы ўступаць з ім у дыялог у такім выпадку. Я прыйшоў сюды праз патрэбу, зайду ў прыбіральню і адразу пакіну гэтую ўстанову. І мы разышліся ў розныя бакі», – распавядае Іван.

На выхадзе з прыбіральні Івана ўжо чакаў міліцыянт.

«Малады чалавек, вы затрыманы, хадземце са мною ў пакой міліцыі». Гэта было маё другое здзіўленне, – прыгадвае падзеі таго дня наш герой. – Я запытаўся: «А якія ў вас падставы мяне затрымліваць?» На што міліцыянт адказаў: «Хадзем-хадзем, я табе пакажу і падставы, і абгрунтаванне».

Паведаміўшы міліцыянту, што такія прычыны затрымання не прадугледжаныя законам, Іван пайшоў у бок выхаду з крамы, дзе яго схапілі. Мужчыну павалілі і некалькі разоў ударылі, спрабуючы апрануць кайданкі, а затым адвезлі ў РАУС. Там на яго склалі пратакол… за выгул сабакі ў неналежным месцы.

«Па пратаколе мне выпісалі штраф дзве базавыя велічыні – 51 рубель. Я з гэтым пагадзіўся, каб хутчэй скончыць з гэтаю справаю», – кажа мужчына.

«Зараз мы вам зробім працяг»

Калі ж Іван паведаміў, што хоча падаць скаргу на дзеянні ахоўнікаў «Кароны», выпускаць яго з-пад варты міліцыянты адразу перадумалі.

«Працаўнік міліцыі ўсміхнуўся і сказаў: «Ага, значыць, вы жадаеце працягу, зараз мы вам зробім працяг», – узгадвае Іван.

Мужчыну зноў павезлі ў «Карону», потым праверылі на алкаголь – толькі тады сабаку Бусю забрала жонка Івана. Па вяртанні ў РАУС мужчыну скруцілі рукі і змясцілі ў адзіночку, не даўшы нават папіць. Нараніцу Івана чакаў суд.

«Каб вы разумелі, паводле артыкулу 23.4 КААП РБ, якія я парушыў, прадугледжаны штраф ад 2-х да 50 базавых. Мне далі амаль максімальны штраф», – кажа мужчына.

За непадпарадкаванне патрабаванням міліцыянтаў спадару Івану прысудзілі 45 базавых велічыняў – Br 1147,5. Павел Сапелка з праваабарончага цэнтру «Вясна» у такіх выпадках раіць звяртацца ў Следчы камітэт ды пракуратуру са скаргамі на жорсткае абыходжанне.

«Дамагацца правядзення праверкі на прадмет наяўнасці ў дзеяннях працаўнікоў складу крымінальнага злачынства, – падкрэслівае П. Сапелка. – Так, сапраўды гэта складана, але я мяркую, што толькі калі кожны або максімальная колькасць асобаў будуць абскарджваць незаконныя дзеянні і дамагацца правядзення максімальна аб’ектыўнага расследавання, то справа пакрысе пачне рухацца наперад».

За восем гадоў, што Буся жыве ў Івана, яна ніколі не мела ні аброжка, ні шворкі.

«У мяне на тэлефоне каля 40 тысяч фотаздымкаў, з якіх мінімум тысяча фота – сабака ў розных установах», – адзначае Іван.

Усе нашыя спробы звязацца са службаю аховы гандлёвага цэнтру «Карона» не прынеслі плёну.

Цяпер Іван Цырульнікаў чакае апеляцыі. І плануе ўсімі магчымымі спосабамі даказваць неправамернасць дзеянняў ахоўнікаў «Кароны».

Таксама ў праграме «Маю права»:

  • У Наваградку неадрамантаваны дах стварае жыхарам шмат нязручнасцяў
  • На Слонімшчыне вяскоўцы засталіся амаль без вады
  • Беларусы – пра адсутнасць камунікацыяў у вёсках
  • Жанчына атрымала працоўную групу інваліднасці, але працаваць не ў стане

Глядзіце праграму «Маю права» цалкам:

Праваабарончую праграму «Маю права» глядзіце кожную сераду а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн або ў закладцы «Праграмы» на нашай старонцы.

Больш матэрыялаў

Былога міліцыянта забралі на Акрэсціна

Мужчына пайшоў у краму – яго ледзь не застрэлілі

Дзіцячаму доктару закідаюць правапарушэнне, якога той не рабіў. Невінаватасць пацвярджаюць камеры відэаназірання

Мужчына праз невыносны боль ходзіць на працу, бо не можа атрымаць інваліднасці

На заводзе пад Петрыкавам людзі паўгода чакаюць заробак

Мужчына дапамог ДАІ злавіць парушальнікаў і сам атрымаў штраф

Кіроўцы Менсктрансу скардзяцца на ўмовы працы, штрафы і ціск кіраўніцтва

Валанцёрка – уладам: «Разбярыце адну рэзідэнцыю, здайце на металалом! Ды зрабіце хоць нешта!»