Беларусы Віктар Савіч і Зміцер Кулакоў трапілі пад каток рэпрэсіяў у Беларусі ды мусілі пакінуць радзіму. Калі Расея пачала ўварванне ва Украіну, яны запісаліся ва ўкраінскае войска і трапілі ў Батальён імя Кастуся Каліноўскага. «Маю права на жыццё» працягвае распавядаць гісторыі добраахвотнікаў, якія змагаюцца за незалежнасць Украіны.
Батальён імя Кастуся Каліноўскага ўжо браў удзел у баях, і Збройныя сілы Украіны адзначылі адвагу беларускіх добраахвотнікаў, назваўшы каліноўцаў сапраўднымі ваярамі.
Віктар Савіч
Віктар Савіч – грамадскі актывіст, прадстаўнік «Сходу», у апазіцыі – з 2006 года. Да выбараў атрымаў 3 штрафы, было некалькі арыштаў, пасля выбараў адседзеў 16 содняў.
«4 ліпеня выбілі 6 зубоў мне, білі шклом у твар. Хлопцы ў цывільным падышлі і спыталі, як прайсці да вакзалу. Міліцыя сказала, што пабоі сам сабе нанёс. Гэта было ў ліпені. Гэта мяне не спыніла», – распавядае Віктар.
9 верасня на Віктара завялі крымінальную справу за нібыта спробу забіць суддзю: справа развалілася, але актывіст усё роўна быў затрыманы, адседзеў 15 содняў паводле сфабрыкаваным закліку да масавай акцыі. Крымінальную справу закрылі, праз 2 месяцы пачалі новую – за абразу. Наш герой да апошняга заставаўся ў Беларусі і нелегальна перайшоў мяжу з Літвою толькі ў ліпені 2021 года, калі папярэдзілі, што рыхтуецца ягоны арышт.
Калі Расея напала на Украіну, Віктар ужо праз некалькі дзён паехаў у Кіеў, каб уступіць у шэрагі добраахвотнікаў: адчуваў абурэнне і адказнасць за тое, што расейскія войскі ўваходзілі ва Украіну з тэрыторыі Беларусі:
«Тое, як павядуць сябе беларусы сёння, вызначыць стаўленне да іх на найбліжэйшыя 300 гадоў».
Віктар служыць у Батальёне імя Кастуся Каліноўскага. Кажа, што хацеў бы выкарыстаць набыты досвед, каб вызваліць Беларусь, і пагражае сілавікам Лукашэнкі, што «ў іх зямля будзе гарэць пад нагамі».
Зміцер Кулакоў
Змітра Кулакова першы раз затрымалі ўлетку 2020 года, яшчэ да збору подпісаў за кандыдатаў на прэзідэнцтва. Наступнае затрыманне адбылося 9 жніўня:
«Далі 10 содняў па сфабрыкаванай справе нібыта за абразу супрацоўніка і непадпарадкаванне. 10 дзён у адзіночцы я правёў, да 19 жніўня, а з 19 жніўня даведаўся, што на мне – крымінальная справа».
Вырак суда – 3,5 года «хіміі». Наш герой пастанавіў нелегальна ўцякаць з Беларусі, але ўдалося яму гэта толькі з другога разу: пры першай спробе быў затрыманы памежнікамі, якія перадалі яго адразу на «хімію», дзе ён правёў 7 месяцаў.
Да службы ва ўкраінскім войску Змітра падштурхнула відэа з дзіцём пад заваламі. Жонка падтрымала нашага героя, хаця адпускаць мужа на вайну было нялёгка. Так мужчына трапіў у Батальён імя Кастуся Каліноўскага, дзе цяпер трэнуецца.
Зміцер прызнаецца, што сумуе па сямʼі, але гэта «стымулюе хутчэй завяршыць вайну, хутчэй разбіць оркаў і жыць у мірнай краіне, якая не адчувае пагрозы звонку».
Праваабарончую праграму «Маю права» глядзіце кожную пятніцу а 18:10 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы»на нашай старонцы.
Калаж з фота: Батальён Кастуся Каліноўскага / telegram
